کراچی: حکمران جماعت کو ضمنی انتخابات میں شکست کا خوف، اتحادی جماعتوں کو بھی الیکشن نہ لڑنے کی ترغیب دینے لگی۔
ذرائع کے مطابق نون لیگ کے وزرا اتحادی جماعتوں کو الیکشن نہ لڑنے کی منتیں کرنے لگے، نون لیگی وفد نے پیپلز پارٹی کو ضمنی الیکشن نہ لڑنے کی درخواست کردی۔
ذرائع کے مطابق لیگی وزرا کا موقف تھا کہ یہ الیکشن میں جانے کا مناسب وقت نہیں ہے، ابھی الیکشن ہارگئےتو عام انتخابات میں نقصان ہوگا۔
لیگی وزرا کا موقف تھا کہ آئی ایم ایف سے ممکنہ ڈیل کے باعث مہنگائی میں مزید اضافہ ہوگا جس کا اثر ووٹرز پر پڑے گا ایسی صورت میں الیکشن میں جانا ٹھیک نہیں ہے۔
یہ بھی پڑھیں: پٹرولیم مصنوعات کی قلت، لیگی سینیٹر اپنی ہی حکومت پر برس پڑے
لیگی وزرا نے دیگر اتحادی جماعتوں کو بھی ضمنی انتخابات میں حصہ نہ لینے کی درخواست کی ہے۔
واضح رہے کہ کراچی میں قومی اسمبلی کے نو حلقوں میں متحدہ پاکستان جوکہ وفاقی حکومت کی اتحادی ہے ضمنی الیکشن میں بھرپور تیاری کے ساتھ میدان میں اترنے جارہی ہے جبکہ پاکستان پیپلز پارٹی بھی ضمنی انتخابات میں حصہ لے رہی ہے۔
پی ڈی ایم کے سربراہ بھی ضمنی انتخابات میں حصہ لینے کے فیصلے پر مخمصے کا شکار ہے گو کہ وہ خود اعلان کرچکے ہیں کہ حالیہ ضمنی انتخابات میں حصہ نہیں لیا جائے گا تاہم سابق صدر اور شریک چیئرمین پییلز پارٹی نے انہیں مشورہ دیا ہے کہ انتخابی میدان کو کھلا چھوڑنا ٹھیک نہیں ہے۔
