مسلم لیگ ن کے سینئر رہنما رانا ثنا اللہ کا کہنا ہے کہ جسٹس منصور شاہ آئینی بنچ کے سربراہ نہیں ہوں گے۔
اے آر وائی نیوز کے مطابق انڈیپینڈنٹ اردو سے گفتگو کرتے ہوئے مشیر سیاسی امور رانا ثنا اللہ نے کہا کہ جسٹس امین الدین خان یا جسٹس جمال مندوخیل آئینی بنچ کے سربراہ ہوسکتے ہیں۔
انہوں نے کہا کہ جسٹس منصور شاہ کا راستہ پی ٹی آئی نے روکا جب ایک سیاسی جماعت کہے ہمارے بات ہوگئی ہے اکتوبر میں جسٹس منصور شاہ آکر بندوبست کریں گے تو ان باتوں کا نقصان ہوتا ہے۔
رانا ثنا اللہ کا کہنا ہے کہ جسٹس منصور علی شاہ کاراستہ روکنے میں حکومت یا کسی اور کا عمل دخل کم پی ٹی آئی کا زیادہ ہے۔
خواتین پر مقدمات کے حوالے سے ان کا کہنا تھا کہ سیاسی مقدمات کو خواتین کی حد تک پھیلانے کےحق میں نہیں، بشریٰ بی بی اور بانی کی بہنوں کے خلاف بھی کیس نہیں بننے چایئے تھے۔
انہوں نے یہ بھی کہا کہ ’میں عمران خان کی بہنوں کے اس جذبے کا حامی ہوں کہ جب پی ٹی آئی کی لیڈر شپ غائب تھی اور عمران خان کی بہنیں ڈی چوک پہنچیں۔‘
رانا ثنا اللہ نے کہا کہ ’وہ بہنیں سیاسی نظریے کے طور پر نہیں بلکہ اپنے بھائی کے لیے ڈی چوک آئیں اور یہ کتنا تقدس ہے بہن بھائی کے رشتے کا۔‘
دوسری جانب رانا ثنا اللہ سے جب سوال کیا گیا کہ ارشد شریف قتل کو دو سال ہو چکے ہیں مگر تاحال یہ معمہ حل نہیں ہو سکا ہے۔ اس پر ان کا کہنا تھا کہ ’یہ معمہ بالکل حل نہیں ہونا۔‘
رنا ثنا اللہ نے کہا کہ ’جو مرضی آپ کریں یہ بالکل حل نہیں ہونا۔ اس کی وجہ یہ ہے کہ کینیا کی پولیس کی ایک تاریخ ہے کہ وہ پیسے لے کر قتل کرتی ہے۔‘
