نمونیا ان بیماریوں میں سے ایک ہے جو بڑوں اور بچوں دنوں کے لیے کافی خطرناک خیال کی جاتی ہے جس سے سرد موسم میں بچنا نہایت ضروری ہوتا ہے۔
اگر آپ کو خود کو اور بچوں کو نمونیہ سے بچانا ہے تو اس عادت کو گرہ میں باندھ لیں کہ منہ بالخصوص دانتوں کی صفائی میں کبھی لاپروائی نہ برتیں۔ منہ کی صحت و صفائی بہتر ہوگی تو جسمانی صحت بھی اچھی رہے گی۔
بہتر طور پر منہ اور دانتوں کی صفائی بالخصوص ان مریضوں کے لیے کافی اہم ہے جو اسپتال میں داخل ہوں کیونکہ ان میں منہ کی صفائی انھیں نمونیا جیسے مرض سے بچاسکتی ہے۔
امریکی تحقیق کاروں نے حال ہی میں 2,700 سے زیادہ مریضوں پر تحقیق کی ہے جس میں یہ بات سامنے آئی ہے کہ روزانہ دانت صاف کرنے سے پھیپھڑوں کے عام انفیکشن کا خطرہ کم ہوجاتا ہے۔
بوسٹن کے بریگھم اینڈ ویمنز اسپتال میں وبائی امراض کے ماہر سیلینا ایرنزلر اور مائیکل کلومپاس نے 15 کلینیکل ٹرائلز کے ذریعے ڈیٹا جمع کیا اور اپنی تحقیق پیش کی۔
اس میں دیکھا گیا کہ جو لوگ یا تو روزانہ کئی بار اپنے دانت صاف کرتے ہیں، یا اپنے منہ کو اینٹی سیپٹک ماؤتھ واش دھوتے ہیں ان کی صحت کافی اچھی ہے۔
منہ کی صحت نہ صرف دانتوں کی سفیدی اور چمک کو برقرار رکھتی ہے بلکہ یہ گلے میں بیکٹیریا یا دیگر وائرس جو پھیپھڑوں کے انفیکشن جیسے نمونیا کا سبب بنتے ہیں اسے بھی روک سکتی ہے۔
ماہرین کی جانب سے کیے گئے 15 کلینیکل ٹرائلز میں تقریباً 2,786 مریضوں کے اعداد و شمار کا تجزیہ کیا گیا تو پتہ چلا کہ اسپتال سے حاصل کردہ نمونیا کی شرح ان مریضوں میں کم تھی جو روزانہ دن میں دو سے تین بار ٹوتھ برش کرتے تھے۔
نمونیا پھیپھڑوں کا ایک عام لیکن مہلک انفیکشن ہے جو پہلے سے بیمار مریضوں کو بیمار کر سکتا ہے۔ اسپتال میں داخل ہونے والے شدید بیمار مریض خاص طور پر اس مرض میں مبتلا ہوسکتے ہیں۔
اسپتال میں قیام کے دوارن 5 سے 10 فیصد مریض کسی نہ کسی قسم کے انفیکشن کا شکار ہوجاتے ہیں اور ان کے نمونیا سے متاثر ہونے کا خدشہ بھی رہتا ہے۔
مریضوں کو دیگر جراثیم سے بچانے کے لیے منہ کی صحت و صفائی کی ترغیب دینا نہایت ضروری ہے۔ برش کرنے سے سانس لینے میں آسانی کی وجہ سے مریضوں میں نمونیا کی شرح میں نمایاں کمی واقع ہوتی ہے۔
