ترکی میں تیار ہونے والا، پاک بحریہ کا پہلا ملجم/بابر کلاس جہاز پی این ایس بابر پاکستان کے لیے روانہ ہو گیا ہے۔
استنبول سے ترک حکام نے پی این ایس بابر کو پہلے سفر پر روانہ کیا، اس بحری جہاز کی کمیشننگ تقریب گزشتہ برس ستمبر میں ہوئی تھی، ذرائع کا کہنا ہے کہ پی این ایس بابر کی باک بحریہ میں انڈکشن کی تقریب بھی جلد کراچی میں منعقد کی جائے گی۔
پی این ایس بابر کی تعمیر کا آغاز 4 جون 2020 کو ہوا تھا، اسے 15 اگست 2021 کو لانچ کیا گیا جب کہ کمیشننگ 23 ستمبر 2023 کو ہوئی، ورٹیکل لانچنگ سسٹم سے لیس بابر کلاس کے 4 جہاز پاک بحریہ میں شامل کیے جا رہے ہیں، پاک ترک معاہدے کے تحت 2 جہاز استنبول اور 2 کراچی میں تیار کیے جا رہے ہیں۔
بابر کلاس کے 3 دیگر جہاز پی این ایس بدر، طارق اور خیبر اس وقت تیاری کے مختلف مراحل میں ہیں، بابر کلاس جہاز بہ یک وقت سطح آب، زیر آب اور فضا میں جنگ لڑنے کی صلاحیت رکھتا ہے، 2888 ٹن بابر کلاس جہاز پر فضائی خطرات سے نمٹنے کے لیے ورٹیکل لانچ سسٹم کے ذریعے ہدف کو نشانہ بنایا جا سکتا ہے۔
