لاہور : مضر صحت اور زہریلے دہی بھلے کھانے سے دو خواتین چل بسیں جبکہ 12سالہ بچے کی حالت اسپتال میں تشویشناک ہے، پولیس نے دکاندار کو گرفتار کرلیا۔

لاہورکے علاقے شیراکوٹ میں دو خواتین اور بچے نے بازار سے مضرصحت دہی بھلے کھائے جس کے بعد ان کی حالت غیر ہوگئی، اسپتال پہنچنے پر2خواتین جاں بحق ہوگئیں۔

جاں بحق ہونے والوں میں ماں،بیٹی شامل ہیں جبکہ12سالہ بیٹے کی حالت بھی تشویشناک ہے جس کو اسپتال میں طبی امداد دی جارہی ہے۔

اس حوالے سے ذرائع کا کہنا ہے کہ ایک گھر کے8افراد نے دہی بھلے کھائے جس کے بعد 3کی حالت زیادہ خراب ہوئی، جنہیں اسپتال پہنچایا گیا۔

شیرا کوٹ کے رہائشی شہری محمداسماعیل نے دہی بھلے والے کیخلاف پولیس کو درخواست دی جس پر فوری کارروائی کرتے ہوئے پولیس نے دہی بھلے بیچنے والے دکاندار طارق کو گرفتار کرلیا، اس سلسے میں ملزم سے مزید تفتیش کی جارہی ہے۔