کراچی : پولیس نے انتیس سالہ فیکٹری ملازم کو مبینہ طور پر تشدد کا نشانہ بنا ڈالا، متاثرہ نوجوان کو تشویشناک حالت میں اسپتال منتقل کردیا گیا ہے۔
تفصیلات کے مطابق کراچی میں پولیس گردی کا ایک اور واقعہ سامنے آگیا ، جہاں ڈسٹرکٹ ویسٹ میں انتیس سالہ فیکٹری ملازم کو بے لگام پولیس اہلکاروں نے بہیمانہ تشدد کا نشانہ بنا ڈالا۔
متاثرہ نوجوان وحید حسین کو تشویشناک حالت میں عباسی شہید اسپتال منتقل کردیا گیا ہے۔
اہل خانہ نے بتایا کہ دو روز قبل اورنگی کے علاقے رئیس امروہی میں رات گئے اہلکاروں نے گھر سے وحید کو حراست میں لیا۔
اہل خانہ کا کہنا تھا کہ کمپنی کے باہرڈکیتی ہوئی تھی پولیس نے شبے میں وحیدکو حراست میں لیا اور 24 گھنٹے تک پوچھ گچھ کی تشدد کا نشانہ بنایا اور چھوڑ دیا۔
اہل خانہ نے مزید بتایا کہ وحید کے جسم کے مختلف حصوں پرتشدد کے نشانات ہیں۔
دوسری جانب پولیس کی جانب سے بیان میں کہا گیا کہ ہمارےپاس اقبال مارکیٹ تھانےمیں وحید کوحراست میں لینےکی کوئی انٹری نہیں، ممکنہ طور پرپولیس کے کسی اور سیل نے تفتیش کیلئے حراست میں لیا ہوگا۔
پولیس کا کہنا تھا کہ معاملے کے حوالے سے مزید تحقیقات کر رہے ہیں۔
