پنجاب کے ضلع نارووال کی تحصیل شکر گڑھ کے تھانہ سٹی میں تعینات اے ایس آئی موٹر سائیکل چور نکلا۔
اے آر وائی نیوز کی رپورٹ کے مطابق ہجویر نگر نارووال میں چوری شدہ موٹر سائیکل کے پارٹس اتروا کر اپنی موٹر سائیکل کو لگاتے ہوئے اے ایس آئی تھانہ سٹی شکر گڑھ عمران پکڑا گیا۔
متاثرہ شہری کی جانب سے پولیس تھانہ سٹی نارووال کو دی گئی درخواست کے مطابق گزشتہ رات چور گھر سے ڈیڑھ لاکھ نقدی، پزائز بانڈ اور موٹر سائیکل لے گئے۔ تاہم دوپہر کے وقت متاثرہ شہری کو معلوم ہوا کہ ان کی چوری شدہ موٹر سائیکل کے پارٹس اتارنے کے لیے اے ایس آئی عمران نے مکینک کو دے رکھی ہے۔
مکینک کا بتانا ہے کہ پارٹس کی تبدیلی نہ کرنے پر پولیس اہلکار نے دھمکیاں دیں۔ پولیس تھانہ سٹی کے مطابق درخواست موصول ہوگئی ہے تاہم اہلکار کے خلاف مقدمہ درج نہیں کیا۔
متاثرہ شہری کا کہنا ہے کہ پولیس پیٹی بھائی کو بچانے میں مصروف ہے اور مقدمہ درج کرنے سے گریزاں ہے۔
