کراچی : کراچی پولیس چیف آفس پرحملے کی تحقیقات میں انکشاف ہوا کہ دہشت گردوں نے حب سے کراچی اسمگلنگ لائن سے فائدہ اٹھایا اور اپنے تخریبی الات اسمگلنگ کی گاڑی میں کراچی لائے تھے۔
تفصیلات کے مطابق کراچی پولیس چیف آفس پر حملے کی تحقیقات جاری ہے ، ذرائع نے بتایا کہ حملے میں ملوث دہشت گردوں نے حب سے کراچی اسمگلنگ لائن سے بھی فائدہ اٹھایا تاہم تحقیقاتی اداروں کو تاحال دہشت گردوں کے مزید سہولت کاروں کی تلاش ہے۔
ذرائع کا کہنا ہے کہ تحقیقاتی اداروں نے دہشتگردوں کی منصوبہ بندی کی مزید تفصیلات بھی حاصل کرلیں ہیں ، دہشت گرد اپنے تخریبی الات اسمگلنگ کی گاڑی میں کراچی لائے تھے۔
ذرائع نے کہا کہ دہشت گردوں کی گاڑی 2 روز تک بلدیہ یوسف گوٹھ بس ٹرمنل پر کھڑی رہی، بعد میں ملزمان اپنا سامان شہزور ٹرک کے ذریعے ناردن بائی پاس اٹک پمپ لے گئے اور اٹک پمپ سے دہشت گردوں نے رکشے کے ذریعے اپنا سامان احسن اباد منتقل کیا۔
واضح رہے کہ حملے کا ماسٹر مائنڈساتھی سمیت سی ٹی ڈی سے مقابلے میں مارا گیا ہے ، مارے گئے دہشت گردوں کے 2ساتھیوں کو سی ٹی ڈی نے گرفتار کرنے کا دعویٰ کیا تھا۔
یاد رہے کہ رواں سال 17فروری شاہراہ فیصل ایف ٹی سی پُل کے قریب کراچی پولیس آفس میں دہشتگردوں نے حملہ کردیا تھا، جس کے بعد قانون نافذ کرنے والے اداروں کے جوانوں نے ان سے تقریباً 3 گھنٹے مقابلہ کیا تھا، اس دوران دو دہشت گرد فائرنگ میں ہلاک ہوگئے جبکہ آخری دہشتگرد نے خود کو دھماکا خیز مواد سے اڑا دیا تھا۔
کے پی او پر حملے کی تحقیقات کے لیے کمیٹی قائم کر دی گئی،ہلاک دہشتگردوں کا موبائل فون برآمد ہوا ہے جبکہ جائے وقوعہ سے ملنے والی شر پسندوں کی کلاشکوف پر درج نمبر مٹا ہوا تھا۔
