کراچی: شہر قائد میں باوردی پولیس اہل کاروں نے بغیر نمبر پلیٹ والی موبائل میں آ کر کوکنگ آئل سے بھری گاڑی لوٹ لی۔
تفصیلات کے مطابق کراچی کے علاقے اورنگی ٹاؤن میں بغیر نمبر پلیٹ پولیس موبائل اور موٹر سائیکل پر باوردی اہل کاروں کی واردات کا انکشاف ہوا ہے۔
اورنگی ٹاؤن سیکٹر 10 فرید کالونی کے متاثرہ تاجر حضرت رحمان نے واردات کے حوالے سے اعلیٰ پولیس افسران کو تحریری طور پر آگاہ کر دیا۔
متاثرہ تاجر نے کہا کہ اورنگی نشان حیدر چوک کے قریب پولیس موبائل اور موٹر سائیکل سوار اہل کاروں نے ان کی سوزوکی کو روکا، اہل کاروں نے ڈرائیور سمیر کی انکھوں پر کپڑا ڈالا، اور کوکنگ آئل سے بھری سوزوکی اپنے ساتھ لے گئے۔
تاجر کی درخواست کے مطابق پولیس اہل کاروں نے اس دوران 6 لاکھ روپے مالیت کا مال نامعلوم مقام پر اتار دیا، اہل کاروں نے ڈرائیور کو 3 گھنٹے بعد مزار قائد کے قریب چھوڑا اور کچھ فاصلے پر گاڑی بھی چھوڑ دی۔
واردات سے متعلق سی سی ٹی فوٹیجز بھی سامنے آ گئی ہیں، فوٹیجز میں پولیس موبائل کو مال بردار سوزوکی کا پیچھا کرتے دیکھا جا سکتا ہے۔
