کراچی : مقامی عدالت نے پیکا ایکٹ میں گرفتار ابراہیم حیدری کے اسٹیشن انویسٹی گیشن افسر ابرار شاہ کو ضمانت پر رہا کردیا۔
تفصیلات کے مطابق صدرمملکت سےمتعلق سوشل میڈیا پر نازیبا پوسٹ کے الزام میں گرفتار ابراہیم حیدری کے اسٹیشن انویسٹی گیشن افسر ابرار شاہ کو عدالت میں پیش کیا گیا۔
مقامی عدالت نے ایس آئی او ابرارشاہ کو ضمانت پر رہا کردیا تاہم تفتیشی افسر کی جانب سے کیس پر مزید کام کیا جا رہا ہے.
ملزم ابرار شاہ پر صدر آصف زرداری سے متعلق سوشل میڈیا پر نازیبا الفاظ لکھنے کا الزام ہے۔
مزید پڑھیں : صدرِ مملکت سے متعلق سوشل میڈیا پر "نازیبا پوسٹ” کرنے والا پولیس افسر گرفتار، مقدمہ درج
یاد رہے صدر مملکت آصف زرداری سے متعلق سوشل میڈیا پر نازیبا پوسٹ کرنے والے پولیس افسر کو گرفتار کرکے پیکا ایکٹ کے تحت مقدمہ درج کیا گیا تھا۔
تفتیشی افسر ابرار شاہ نے فیس بک پر 2 اپریل کو پوسٹ کی تھی، جس میں صدر پاکستان آصف علی زرداری کے خلاف نازیبا الفاظ لکھے گئے تھے۔
مقدمہ سکھن تھانے کے ڈیوٹی افسر یعقوب کی مدعیت میں درج ہوا، مدعی مقدمہ کے مطابق میں اپنے موبائل فون پر لوگوں کے کمنٹس پڑھ رہا تھا کہ رات 8 بجکر 40 منٹ پر ابرار شاہ نے انگریزی میں کمنٹ لکھا۔
مقدمے میں کہا گیا تھا کہ ابرار شاہ نے اہم عہدے پر براجمان شخصیت کی طرف اشارہ کیا اور نازیبا تحریر درج کی جس سے مجھ سمیت دیگرشہریوں کی دل آزاری ہوئی۔
