پشاور: پولیس افسران اور اہلکاروں کے سوشل میڈیا استعمال کرنے پر پابندی عائد کرتے ہوئے سوشل میڈیا پلیٹ فارمز پر کوئی مواد شیئر نہ کرنے کے احکامات جاری کردیئے گئے۔
تفصیلات کے مطابق پشاور میں پولیس افسران اور اہلکاروں کے سوشل میڈیااستعمال کرنے پرپابندی عائد کردی گئی ہے۔
ایس ایس پی آپریشنز پشاور کاشف آفتاب عباسی نے پولیس افسران کوسوشل میڈیا پالیسی سے متعلق خط لکھ دیا ہے، جس میں کہا ہے کہ پولیس اہلکار مختلف سوشل میڈیا پلیٹ فارمزاستعمال کر رہے ہیں اور مختلف غیر سرکاری واٹس ایپ گروپس کا بھی حصہ ہیں۔
خط میں کہنا تھا کہ سوشل میڈیا کے ذریعے جھوٹی اورسنسنی خیز خبروں کو پھیلا کر پولیس کے مورال کو متاثر کرنے کی کوشش کی جا رہی ہے، اس لیے پولیس سوشل میڈیا پلیٹ فارمز اور واٹس ایپ گروپس سے علیحدگی اختیارکریں۔
ایس ایس پی آپریشنز پشاور نے کہا کہ پولیس اہلکاروں کو سوشل میڈیا پلیٹ فارمز پر کوئی مواد شیئر نہ کرنے کے احکامات جاری کیے گئے ہیں، جس کی باقاعدہ نگرانی کی جائے گی اور خلاف ورزی کرنے والوں کے خلاف سخت کارروائی ہوگی۔
