کراچی : سی ویو سے لاپتہ ہونے والی دو بچیوں سے متعلق پولیس نے دعویٰ کیا ہے کہ واقعے کی فوٹیج حاصل کر لی ہے، ملزم تک پہنچنے کی کوشش کر رہے ہیں۔
تفصیلات کے مطابق کراچی میں سی ویو سے عید کے تیسرے روز سے لاپتہ دو بچیوں کو تاحال تلاش نہیں کیا جاسکا، لاپتہ ہونے والی بچیوں سے متعلق پولیس نے بیان جاری کر دیا۔
پولیس نے دعویٰ کیا ہے کہ تفتیشی افسر نے واقعے کی فوٹیج حاصل کر لی ہے اور ملزم کوگرفتار کرنےکےلیےاقدامات کیےجارہے ہیں۔
پولیس کا کہنا تھا کہ نوٹس تمام تھانہ جات ،مختلف جگہوں پرچسپاں کیےگئے ہیں اور اشتہارات کو سوشل میڈیا پر بھی وائرل کیا گیا ہے۔
یاد رہے کراچی میں دو ننھی منی بچیاں پراسرار طور پر لاپتہ ہوگئیں، تین سالہ عنابیہ اور دو سالہ بشری اپنے خاندان کے ہمراہ عید کے تیسرے روز سی ویو پر پہنچی تھی۔
بچیوں کے والد کا کہنا ہے کہ دو دن دھکے کھانے اور بااثر شخص کے فون کرنے پر پولیس نے درخشاں تھانے میں مقدمہ تو درج کرلیا لیکن مدد کرنے کیلئے تیار نہیں۔
والد کا مزید کہنا تھا کہ بچیوں کے لاپتہ ہونے پر پولیس کی جانب سے ایک مرتبہ پھر سنگین غفلت کا مظاہرہ کیا گیا ہے۔
