محکمہ پولیس کا سلوگن ہے "پولیس کا کام ہے خدمت عوام کی” لیکن اس کے برعکس پنجاب میں پولیس اہلکاروں نے چوروں کا روپ دھار لیا ہے۔
بچپن میں اکثر لوگوں نے چور پولیس کا کھیل کھیلا ہوگا جس میں کبھی کوئی پولیس بنتا ہے تو اگلی بار وہی چور بن جاتا ہے لیکن پنجاب میں حقیقت میں پولیس چور بن گئی اور سوتے ہوئے شخص کا موبائل فون چرا لیا۔
اے آر وائی نیوز کے مطابق پنجاب کے شہر حافظ آباد میں پولیس اہلکاروں نے دوران گشت سوئے ہوئے شخص کا موبائل فون چوری کرلیا، پولیس اہلکاروں کی صفائی سے کی گئی چوری کی یہ واردات سی سی ٹی وی فوٹیج کے ذریعے منظر عام پر آگئی ہے۔
مبینہ چور پولیس اہلکاروں سے متاثرہ شخص نے دو اہلکاروں ابوبکر اور عمر پر موبائل چوری کا الزام عائد کرتے ہوئے ان کے خلاف کارروائی کی درخواست دے دی ہے جب کہ اس کا کہنا ہے کہ جب اس نے چور اہلکاروں سے اپنا موبائل فون واپس مانگا تو پولیس اہلکاروں نے اسے موبائل واپس کرنے کے بجائے تشدد کا نشانہ بنایا۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں