سابق وزیراعلیٰ پنجاب چوہدری پرویز الہٰی کے گھر پر پولیس چھاپے پر ان کے صاحبزادے اور سابق وفاقی وزیر نے طنزیہ ٹویٹ کیا ہے۔
اے آر وائی نیوز کے مطابق جمعہ اور ہفتے کی درمیانی شب لاہور میں سابق وزیراعلیٰ پنجاب اور پی ٹی آئی کے مرکزی صدر چوہدری پرویز الہٰی کی گرفتاری کے لیے ان کی رہائشگاہ پر پولیس نے چھاپہ مارا۔ پولیس گھر کی تین بار تلاشی کے باوجود پرویز الہٰی کو تو گرفتار نہ کرسکی تاہم 25 سے زائد افراد کو حراست میں لے لیا گیا۔
پولیس کی اس کارروائی پر چوہدری پرویز الہٰی کے صاحبزادے اور سابق وفاقی وزیر مونس الہٰی نے سماجی رابطوں کی ویب سائٹ ٹوئٹر پر طنزیہ ٹویٹ کیا ہے۔
چوہدری مونس الہٰی نے اپنے ٹویٹ میں لکھا کہ شاباش پنجاب پولیس، پرویز الٰہی نے بیورو کریٹس کی مرضی کیخلاف آپ کو مراعات دلوائیں۔ اس کے ساتھ انہوں کے گھر پر پولیس چھاپے کے ویڈیو بھی شیئر کی ہے جس میں اہلکاروں کو رہائشگاہ کے مرکزی دروازے کو توڑنے کی کوشش کرتے دکھایا گیا ہے۔
شاباش پنجاب پولیس. اسی لیے چودھری پرویزالٰہی نے بیوروکریٹس کی مرضی کے خلاف آپ کو مراعات دلوائیں pic.twitter.com/P0j5x5G8wW
— Moonis Elahi (@MoonisElahi6) April 29, 2023
انہوں نے اس سے قبل اپنے ایک اور ٹویٹ میں لکھا کہ عمران خان درست کہتے ہیں کہ پاکستان میں قانون کی حکمرانی ختم ہوگئی ہے۔ چھاپے کے وقت اہلیہ اور بچے گھر پر تھے ان سے کہا کہ پولیس سے تعاون کریں۔
Punjab police is at our residence to arrest my father right now in a case for which he got bail today. His bail hearing was covered by all media outlets. PM @ImranKhanPTI is absolutely right : Rule of Law has ended in Pakistan.
— Moonis Elahi (@MoonisElahi6) April 28, 2023
علاوہ ازیں مذکورہ کارروائی پر چوہدری پرویز الہٰی کی بھانجی اور سابق رکن پنجاب اسمبلی ایمان طاہر نے بھی مذمت کی ہے اور کہا ہے کہ ہمارے خاندان کے لیے یہ بہت افسوسناک ہے۔ بدقسمتی ہے کہ چوہدری شجاعت کو ایسا دن دیکھنا پڑے گا جب گھر کا تقدس پامال کیا گیا، خواتین کو ہراساں اور ملازمین پر وحشیانہ حملے کیے۔ آخر حکومت کس حد تک گرے گی؟ شرمناک۔
