ڈی آئی خان : پولیس نے پی ٹی آئی رہنما علی امین گنڈاپور کی رہائش گاہ پر چھاپہ مارکر سیلاب، کورونا ریلیف کاسامان، غلیل اور ڈنڈوں کے تھیلے برآمد کرلئے۔
تفصیلات کے مطابق 9مئی سے روپوش سابق وفاقی وزیرعلی امین گنڈاپور کی گرفتاری کیلئے مقامی پولیس نے ان کے گھر پر چھاپہ مارا تاہم علی امین گنڈاپور گھر موجود نہیں تھے، اس لیے گرفتاری نہ ہوسکی۔
پولیس نے گھر سے سیلاب ریلیف، کرونا ریلیف اور غلیلوں اور ڈنڈوں کے تھیلے بھی برآمد کر لئے ہیں۔
علی امین گنڈا پور نے چند روز قبل نگراں وزیر اعلیٰ کو خط لکھا تھا، سوشل میڈیا پر وائرل ہونے والےاس خط میں نگران وزیر اعلیٰ پر کئی الزامات عائد کئے گئے تھے۔
انہوں نے نگران وزیر اعلیٰ اعظم خان کے خلاف عوام کو اکسایا اور دھمکیاں دی تھیں، پولیس نے وزیراعلٰی کو لکھےگئے خط پر جوابی کاروائی کی ہے۔
پولیس نے علی امین کے گھر سے ریلیف کے سامان کے کئی ٹرک بھر کر لے گئی ہے۔
دوسری جانب علی امین کی خاندانی ذرائع نے پولیس کاروائی کی تصدیق کرتے ہوئے کہا کہ پولیس ہمارا ذاتی سامان لے گئی ہے ، اس سامان کی رسیدیں موجود ہیں۔
پولیس ذرائع کے مطابق یہ سرکاری ریلیف کا سامان ہے ، یہ سامان مقامی انتظامیہ نے غریب عوام کی امداد کیلئے جاری کیا تھا۔
