کراچی : پولیس کی جعلی وردی میں وارداتیں کرنے والا ملزم پکڑا گیا، ملزم نے مختلف وارداتوں میں200سے زائد موبائل فون لوٹے، نوسرباز ملزم کو سی سی ٹی وی فوٹیج کی مدد سے گرفتار کیا گیا۔
تفصیلات کے مطابق پولیس وردی میں ملبوس نوسربازی کی ڈبل سنچری کرنے والا ملزم پولیس نے گرفتار کرلیا، گلشن اقبال پولیس نے گل خان کو موبائل مارکیٹ سے گرفتار کیا۔
اس حوالے سے پولیس حکام کا کہنا ہے کہ ملزم گل خان اپنے ساتھی کے ہمراہ پولیس وردی میں نوسربازی کرتا ہے، ملزمان نے مختلف وارداتوں میں200سے زائد موبائل فون لوٹے، شکایات ملنے پر نوسرباز کو سی سی ٹی وی فوٹیج کی مدد سے گرفتار کیا گیا۔
گرفتار ملزم نے انکشاف کیا کہ پولیس کی وردی ایک اہلکار دوست سے لی، جسے پہن کر کسی بھی موبائل مارکیٹ جاتے ہیں، دکاندار سے کہتے ہیں کہ نیچے گاڑی میں میڈم کو موبائل دکھانے ہیں پھر دو تین ڈبہ پیک موبائل دکان سے لے کر رفو چکر ہوجاتے تھے۔
پولیس کے مطابق ملزمان پولیس کی وردی میں شہریوں کو روک کر ان کی تلاشی بھی لیتے تھے، شہری کو ڈرا دھمکا کر کہتے کہ تمہارے پاس چھینا ہوا موبائل فون ہے آپ پیچھے تھانے آجاؤ، بعد ازاں ملزمان شہریوں سے موبائل فون لوٹ کر فرار ہوجاتے تھے۔
پولیس کا کہنا ہے کہ ملزم کیخلاف مقدمہ درج کرکے اس کے ساتھی کی تلاش میں چھاپے مارے جارہے ہیں، مزید تفتیش جاری ہے۔
