گھوٹکی میں پولیس چوکی سے اغوا کیے گئے دو پولیس اہلکاروں کو بازیاب کروالیا گیا۔
اے آر وائی نیوز کے مطابق ایس ایس پی سمیر نور کا بتانا ہے کہ اغوا کاروں کا محاصرہ کرکے مغوی اہلکاروں کو بازیاب کروایا گیا ہے۔
ایس ایس پی کا کہنا ہے کہ پولیس کے دباؤ میں آکر اغوا کاروں نے اہلکاروں کو رہا کردیا۔
پولیس کا بتانا ہے کہ تھانہ آندل سندرانی کی پولیس چوکی پر حملے میں اہلکاروں کو اغوا کیا گیا تھا، ڈاکوؤں کے حملے میں ایک اہلکار شہید جبکہ جوابی فائرنگ میں ڈاکو ہلاک ہوا تھا۔
پولیس کا کہنا تھا کہ ہلاک ڈاکو کا نام امان اللہ عرف امانو سندرانی ہے، ہلاک ڈاکو اغوا برائے تاوان سمیت دیگر سنگین مقدمات میں مطلوب تھا ساتھ ہی ڈاکو پروفیسر ڈاکٹر اجمل ساوند قتل کیس میں بھی نامزد تھا۔
علاوہ ازیں جیکب آباد میں ڈاکوؤں نے ایک روز میں تین افراد کو اغوا کرلیا۔ رواں ماہ اغوا ہونے والوں کی تعداد 9 ہو گئی جن تین افراد کو اغوا کیا گیا ان میں عامر سرکی، خادم حسین سرکی اور بابو پھوڑ شامل ہیں۔
مغویوں کی بازیابی کے لئے پولیس کی بھاری نفری ڈاکوؤں کے تعاقب میں روانہ کردی گئی تھی۔
دوسری جانب مغویوں کے رشتے داروں نے سندھ بلوچستان اور پنجاب کو ملانے والی قومی شاہراہ پر دھرنا دے کر ٹریفک معطل کردیا تھا۔
