اسلام آباد: کوئٹہ میں مزید دو پازیٹو سیمپلز سامنے آنے کے بعد رواں برس پولیو پازیٹو سیوریج سیمپلز کی تعداد 92 تک پہنچ گئی ہے۔

ذرائع وزارت صحت کے مطابق موذی پولیو وائرس نے ملکی سیوریج پر پھر سے پنجے گاڑ لیے ہیں، وزارت صحت نے پولیو پازیٹو سیوریج سیمپلز سے متعلق ٹیکنیکل رپورٹ تیار کر لی، جس میں کہا گیا ہے کہ رواں برس پولیو پازیٹو سیوریج سیمپلز کی تعداد 92 تک پہنچ گئی ہے۔

کوئٹہ کے دو ماحولیاتی سیمپلز میں پولیو وائرس کی تصدیق ہوئی ہے، یہ رواں سال کوئٹہ کی سیوریج میں ساتویں بار پولیو کی تصدیق ہے، اس بار کوئٹہ کے دو مقامات کی سیوریج میں پولیو وائرس پایا گیا ہے۔

ذرائع کے مطابق کوئٹہ کی سیوریج سے پولیو ٹیسٹ کے لیے سیمپلز 27 نومبر کو لیے گئے تھے، جس میں کوئٹہ کے علاقے سورپل کی سیوریج میں پولیو وائرس کی تصدیق ہوئی ہے، اس پولیو وائرس کا جینیاتی تعلق گڈاپ سے ہے۔

جاتک کلے اور تختانی کی سیوریج میں بھی پولیو وائرس کی تصدیق ہوئی، یہ پولیو وائرس جینیاتی طور پر لوکل ہے، ذرائع نے بتایا کہ رواں برس ملک میں پولیو وائرس کے 6 کیسز رپورٹ ہو چکے ہیں۔