مردان: خیبر پختو ن خوا کے سینئر صوبائی وزیر محمد عاطف خان نے بچوں کو انسداد پولیو کے قطرے پلا کر 22 اپریل سے شروع ہونے والی سہ روزہ انسداد پولیو مہم کا افتتاح کر دیا۔
گزشتہ دن سینئر صوبائی وزیر کے پی کے محمد عاطف خان نے اپنے حجرے مردان ہاؤس میں بچوں کو انسداد پولیو کے قطرے پلا کر 22 اپریل سے شروع ہونے والی سہ روزہ انسداد پولیو مہم کا افتتاح کیا۔
اس موقع پر ڈبلیو ایچ او، یونیسیف اور دیگر متعلقہ اداروں کے نمائندے بھی موجود تھے۔
افتتاح کے بعد سینئر وزیر نے میڈیا کے نمائندوں سے گفتگو کرتے ہوئے کہا کہ انسداد پولیو مہم اپنے حجرے سے شروع کیے جانے کا مقصد یہ ہے کہ مردان میں گٹر کے پانی سے جو نمونے ٹیسٹ کیے ہیں ان میں پولیو وائرس کی موجودگی کا انکشاف ہوا ہے۔
یہ بھی پڑھیں: قبائلی ضلع مہمند میں انسداد پولیو ورکر کو قتل کردیا گیا ، ایک ملزم گرفتار
انھوں نے مردان میں 22 اپریل سے شروع ہونے والی پولیو مہم کو نہایت اہمیت کا حامل قرار دیتے ہوئے کہا کہ مردان میں 2014 کے بعد پولیو کا کوئی کیس نہیں لیکن ہمیں بہت محتاط رہنے کی ضرورت ہے کیونکہ گٹر کے پانی سے لیے گئے نمونوں میں پولیو وائرس مثبت آ رہا ہے۔
انھوں نے کہا کہ ہماری بھرپور کوشش ہے کہ دس بیماریوں کے خلاف ضروری ٹیکہ جات کو بہتر بنایا جائے، اگر کہیں یہ دس بیماریوں کے ٹیکے نہیں لگائے جا رہے ہیں تو وہاں کے لوگوں کو چاہیے کہ وہ محکمہ صحت کے اسٹاف سے تعاون کریں۔
یاد رہے کہ 8 اپریل کو خیبر پختون خوا کے قبائلی علاقے کے ضلع مہمند میں واجد نامی انسداد پولیو ورکر کو فائرنگ کر کے قتل کر دیا گیا تھا۔
