کراچی: صدر کراچی چیمبر آغا شہاب نے کہا ہے کہ کیماڑی سانحے پر سیاست بند کی جائے، کراچی و پاکستان کی معیشت، کاروبار متاثر ہو رہا ہے۔
میڈیا کو جاری بیان میں صدر کراچی چیمبر نے کہا کہ وفاقی، صوبائی و مقامی حکومتیں کیماڑی کے المناک سانحے پر سیاست کررہی ہیں جسے بندکیا جائے، سیاست کی وجہ سے کراچی اور پاکستان بھر کی معاشی و کارباری سرگرمیاں درحقیقت متاثر ہورہی ہیں۔
یہ بھی پڑھیں: کراچی میں زہریلی گیس، سندھ حکومت کو 50 ہزار ماسک مل گئے
انہوں نے کہا کہ کراچی پورٹ ٹرسٹ کی سرگرمیوں میں کسی بھی قسم کے خلل کی وجہ سے کراچی شہر کی معاشی سرگرمیوں پر انتہائی منفی اثرات پڑیں گے، کیماڑی سانحے میں معصوم افراد کی لاشوں پر سیاست کرنے کے بجائے جامع تحقیقات کا آغاز کیا جائے اور ذمے دار کو سخت سزا دی جائے۔
صدر کراچی چیمبر نے کہا کہ دعوے کئے جارہے ہیں کہ سانحے کی وجہ مخصو ص شپمنٹ سے سویابین سے نکلنے والی ڈسٹ ہوسکتی ہے جس کے امکانات نہ ہونے کے برابر ہیں، ہرسال تقریباً25کے قریب سویابین شپمنٹس کی آمد کے پی ٹی پر ہوتی ہے اور کبھی بھی کوئی واقعہ نہیں سنا گیا، مشکوک مال کو پورٹ قاسم بھیج دینا مسئلے کا حل نہیں پورے معاملے کی تفصیلی سائنسی تحقیقات کرنے کی ضرورت ہے۔
