اسلام آباد: مصورہ رابعہ ذاکر نے ترک صدر رجب طیب اردوان کے دورہ پاکستان کا خیر مقدم کرتے ہوئے ان کا شان دار پورٹریٹ تیار کر لیا ہے۔
اے آر وائی نیوز کے مطابق پاکستانی مصورہ رابعہ ذاکر نے دورے پر آنے والے ترک صدر کا پورٹریٹ تیار کر لیا ہے، جو رجب طیب اردوان کو تحفتاً پیش کیا جائے گا۔
ترک صدر رجب طیب اردوان کے اس پورٹریٹ کی تیاری میں ایک ہفتہ لگا، رابعہ ذاکر نے ترک صدر کی پینٹ کوٹ میں آفیشل تصویر کو کینوس میں اتارا، پورٹریٹ ترک صدر کو دورہ پاکستان پر عوام کی طرف سے بہ طور تحفہ پیش کیا جائے گا۔
رابعہ ذاکر ترکی پیس آرٹ کی مڈل ایسٹ کی نائب صدر بھی ہیں، پاکستانی مصورہ نے ترک صدر کے پورٹریٹ کو پاکستانی عوام کی جانب سے تحفہ قرار دے دیا ہے، ان کا کہنا ہے کہ ہم ترک قوم کو محبت کا جواب محبت میں دیں گے۔ اپنے ویڈیو پیغام میں انھوں نے کہا کہ میرا تیار کردہ پورٹریٹ ترک صدر کو دورہ پاکستان کی یاد دلائے گا۔
یاد رہے کہ گزشتہ برس اکتوبر میں برطانوی پرنس ولیم اور کیٹ میڈلٹن جب پاکستان کے دورے پر آئے تھے تو رابعہ ذاکر نے ان کی شادی کا پورٹریٹ تیار کر کے انھیں تحفے میں پیش کیا تھا، پورٹریٹ میں رائل چہروں کے خال و خد واضح کرنے کے لیے مصورہ کو یورپی آرٹسٹ سے مشاورت کرنا پڑی تھی۔
اس سے قبل مارچ 2019 میں پاکستانی آرٹسٹ رابعہ ذاکر نے شہزادہ محمد بن سلمان کا پورٹریٹ بھی تیار کیا تھا، یہ تحفہ سعودی سفارت خانے میں سفیر نے وصول کیا تھا۔
