کراچی : ہتھنی نور جہاں کی پوسٹ مارٹم ویڈیو سوشل میڈیا پر وائرل ہونے پر چڑیا گھر انتظامیہ میں کھلبلی مچ گئی، انتظامیہ نےعملے سے پوچھ گچھ شروع کردی۔
تفصیلات کے مطابق کراچی کے چڑیا گھر کی انتظامیہ نے غفلت، نااہلی اور بے حسی کی انتہا کردی، ہتھنی نورجہاں کی پوسٹ مارٹم کی ویڈیو لیک ہوگئی۔
سوشل میڈیا پر نورجہاں کی پوسٹ مارٹم ویڈیو وائرل ہونے پر چڑیا گھرانتظامیہ میں کھلبلی مچ گئی، ذرائع نے بتایا کہ چڑیا گھر انتظامیہ نے ویڈیو لیک ہونے پر عملے سے پوچھ گچھ شروع کردی ہے۔
جانوروں سے محبت کرنے والے ویڈیو وائرل ہونے پر سخت برہمی کا اظہار کر رہے ہیں۔
یاد رہے گذشتہ ہفتے تمام کوششوں کے باوجود کراچی چڑیا گھر کی علیل ہتھنی چل بسی تھی، ہتھنی نورجہاں بخارمیں مبتلا تھی ، ہتھنی نورجہاں کا علاج عالمی سطح کےماہرین کی زیرنگرانی ہورہا تھا۔
کراچی چڑیا گھر میں 17 سال سے موجود نورجہاں گذشتہ کئی روز سے زمین پر لیٹی ہوئی تھی اور اپنے پاؤں پر کھڑی نہیں ہوپارہی تھی۔
