اسلام آباد: 969 میگاواٹ کے نیلم جہلم پروجیکٹ سے بجلی کی پیداوار اس ماہ کے آخر تک دوبارہ شروع ہو جائے گی، ٹیل ریس ٹنل میں بحالی کا کام تکمیل کے قریب ہے۔
اے آر وائی نیوز کے مطابق ترجمان واپڈا کا کہنا ہے کہ نیلم جہلم ہائیڈرو پاور پروجیکٹ کی ٹیل ریس ٹنل میں بحالی کا کام تکمیل کے قریب ہے، 969 میگاواٹ کے پروجیکٹ سے بجلی کی پیداوار دوبارہ سے اس ماہ شروع ہو جائے گی۔
ترجمان واپڈا نے بتایا کہ چیئرمین واپڈا لیفٹیننٹ جنرل سجاد غنی (ریٹائرڈ) نے نیلم جہلم پروجیکٹ کا دورہ کیا، چیئرمین نے ٹیل ریس ٹنل میں بحالی کے کام کا تفصیلی جائزہ لیا۔
چیئرمین واپڈا نے اس موقع پر کہا کہ ٹیل ریس ٹنل کے منہدم ہونے والے حصے میں کنکریٹ لائننگ مکمل کی جا چکی، انھوں نے منصوبے سے بجلی کی پیداوار دوبارہ شروع کرنے کے حوالے سے تیاریوں کا جائزہ بھی لیا۔
چیئرمین کو بریفنگ دیتے ہوئے بتایا گیا کہ ساڑھے 3 کلو میٹر طویل ٹیل ریس ٹنل کے دیگر متاثرہ حصوں کو بھی مضبوط کیا جاچکا ہے۔
اگلے ہفتے ٹیل ریس ٹنل سے مشینری ہٹا کر صفائی کا عمل شروع کیا جائے گا، صفائی مکمل ہونے پرٹیل ریس ٹنل میں پانی کی بھرائی شروع کی جائے گی، بھرائی کے بعد پروجیکٹ سے بجلی کی پیداوار دوبارہ شروع ہو جائے گی۔
