اسلام آباد: پاکستان پیپلز پارٹی کے سینیٹر رضاربانی آرمی ایکٹ ترمیم پر سینیٹ سے واک آؤٹ کرگئے۔
اے آر وائی نیوز کے مطابق سینٹ اجلاس کے خطاب میں پاکستان پیپلز پارٹی کے سینیٹر رضاربانی نے کہا کہ کچھ بلز ہمیں آج صبح ملے ہیں، ان بلز کا تعلق آرمی ایکٹ، کنٹونمنٹس، ڈیفنس ہاؤسنگ اتھارٹی ایکٹ سے ہے۔
سینیٹر رضاربانی نے ایوان سے کہا کہ اس بل کو متعلقہ قائمہ کمیٹی میں بھیجا جائے، قواعد و ضوابط کو بالائے طاق رکھا گیا ترامیم کو خاطر میں نہیں لایاگیا۔
انہوں نے کہا کہ ابھی جو بل پاس ہوئے یہ پارلیمان کی تاریخ کا سیاہ دن ہے، اس طریقے سے بلائنڈ قانون سازی ہوئی ہے، ہمیں نہیں پتا بل میں کیا ہے میں اسکے خلاف واک آؤٹ کرتا ہوں۔
سینیٹر رضاربانی نے کہا کہ ہمیں بل کی کاپیاں نہیں دی گئیں، اچانک 3 بل سینیٹ میں منظوری کیلئے پیش کئے گئے جس کے بعد رضا ربانی سینٹ سے واک آؤٹ کرگئے۔
سینیٹ میں آرمی ایکٹ ترمیمی بل منظور
چیئرمین سینیٹ صادق سنجرانی کی سربراہی میں سینیٹ کا اجلاس ہوا جس میں وزیر دفاع خواجہ آصف نے آرمی ایکٹ ترمیمی بل منظوری کے لیے پیش کیا جسے ایوان نے منظور کرلیا۔
بل کے متن کے مطابق سرکاری حیثیت میں ملکی سلامتی اور مفاد میں حاصل معلومات کے غیر مجاز انکشاف پر5 سال تک سخت سزا دی جائے گی، آرمی چیف یا بااختیار افسر کی اجازت سے انکشاف کرنے والے کو سزا نہیں ہوگی۔
