کراچی : پیپلز پارٹی نے وفاقی بجٹ منظوری میں اتحادی حکومت کو ووٹ دینے کا فیصلہ کرتے ہوئے رہنماؤں کو ن لیگ کے خلاف بیان بازی سےبھی روک دیا۔
تفصیلات کے مطابق مسلم لیگ ن اور پیپلز پارٹی کے درمیان بجٹ تنازع پر اختلافات ختم ہوگئے اور پیپلز پارٹی نے وفاقی بجٹ منظوری میں اتحادی حکومت کو ووٹ دینے کا فیصلہ کرلیا۔
پیپلز پارٹی نے رہنماؤں کو ن لیگ کے خلاف بیان بازی سے بھی روک دیا ہے ، وفاق نےسندھ کو تیس ارب روپےاضافی دے دیئے، تیس ارب سیلاب سے متاثرہ مکانات اورانفراسٹریکچر کی بحالی پر لگائے جائیں گے۔
گذشتہ روز وزیراعظم شہباز شریف سے وزیراعلیٰ سندھ مراد علی شاہ کی اسلام آباد میں ملاقات ہوئی تھی ، جس میں وزیراعلیٰ سندھ نے سیلاب متاثرین کیلئےوفاقی بجٹ میں الگ بجٹ مختص کرنے کامعاملہ اٹھایا تھا۔
وزیراعلیٰ نے مطالبہ کیا تھا کہ سندھ حکومت نے سیلاب متاثرین کیلئے25 ارب روپے رکھے ہیں جب کہ وفاق بھی25 ارب روپے مختص کرے۔
وزیراعظم نے وزیراعلیٰ سندھ کو سیلاب متاثرین کیلئے وفاقی بجٹ میں 25ارب روپے مختص کرنےکی یقین دہانی کروائی تھی۔
