پشاور: خیبرپختون خواہ کے ضلع بنوں میں نامعلوم افراد نے فائرنگ کر کے پاکستان پیپلزپارٹی کے مقامی رہنما کو قتل کردیا۔
اے آر وائی نیوز کے مطابق خیبرپختون خواہ کے ضلع بنوں کے مقام کچہری میں نامعلوم افراد کی فائرنگ سے پاکستان پیپلزپارٹی (پی پی پی) کے ضلعی صدر اشفاق خان جاں بحق ہوگئے۔
ضلعی صدر کی ہلاکت پر پی پی کارکنان نے احتجاج کیا اور قاتلوں کی فوری گرفتاری کا مطالبہ بھی کیا۔
دوسری جانب پاکستان پیپلزپارٹی کے چیئرمین بلاول بھٹو زرداری نے بنوں کے ضلعی صدر کے قتل کو بہیمانہ قرار دیتے ہوئے اس کی شدید مذمت کی۔
انہوں نے قاتلوں کی فوری گرفتاری کا مطالبہ کرتے ہوئے صوبائی حکومت کی کارکردگی پر سوال بھی اٹھایا۔
بلاول بھٹو نے کہا کہ بنوں کے ضلعی صدر ملک اشفاق خان کے قاتلوں اور اُن کے سرپرستوں کو کیفر کردار تک پہنچا کر دم لیں گے۔ انہوں نے لواحقین کے ساتھ اظہار یکجہتی بھی کیا۔
یاد رہے کہ پانچ روز قبل پشاور کی مصروف شاہراہ چارسدہ روڈ پر پولیس تھانہ فقیرآباد سے تقریبا 100 میٹر کے دور واقع چارسدہ بس اسٹینڈ کے سامنے معروف سکھ حکیم سردار ستنام سنگھ معمول کے مطابق اپنے مطب میں بیٹھے تھے کہ نامعلوم مسلح افراد نے مطب میں داخل ہوکر ان پر قاتلانہ حملہ کیا، جس میں وہ جاں بحق ہوگئے تھے۔
پولیس حکام نے بتایا تھا کہ سکھ حکیم کو چار گولیاں ماری گئیں، قتل کی وجہ فوری طور پر سامنے نہیں آسکی مگر پولیس نے اسے ٹارگٹ کلنگ کا شاخسانہ قرار دیا تھا۔ ابتدائی طور پر نامعلوم ملزمان کے خلاف روزنامچہ درج کیا جبکہ یکم اکتوبر کو باقاعدہ ایف آئی آر درج کی گئی تھی۔
