اسلام آباد: پاکستان پیپلز پارٹی نے عام انتخابات کی تیاریوں کے باقاعدہ آغاز کا فیصلہ کرتے ہوئے اس حوالے مشاورت سے مکمل کر لی۔
پارٹی ذرائع نے بتایا کہ پیپلز پارٹی قیادت الیکشن سے قبل پنجاب اور خیبر پختونخوا کے دورے کرے گی، چیئرمین بلاول بھٹو زرداری پہلے فیز میں کے پی اور دوسرے میں پنجاب جائیں گے۔
ذرائع نے بتایا کہ بلاول بھٹو زرداری کے دوروں کا مقصد دونوں صوبوں میں پارٹی کو فعال کرنا ہے، الیکشن سے قبل صوبوں میں ورکرز کنونشنز کیے جائیں گے۔
صوبائی تنظمیوں کو ورکرز کنونشنز کی تیاریوں سے متعلق ہدایات جاری کر دی گئیں۔ چیئرمین پیپلز پارٹی آئندہ ماہ 15 نومبر کو خیبر پختونخوا کا پانچ روزہ دورہ کریں گے۔
ذرائع کے مطابق پشاور، مردان، ایبٹ آباد، جنوبی وزیرستان اور کوہاٹ میں کنونشنز ہوں گے، بلاول بھٹو زرداری ان کنونشنز سے خطاب کریں گے۔
پارٹی ذرائع نے بتایا کہ دوسرے مرحلے میں پنجاب میں ورکرز کنونشنز کیے جائیں گے جن کیلیے شیڈول تیار کیا جا رہا ہے، چیئرمین دونوں صوبوں میں پارٹی عہدیداروں سے ملاقاتیں کریں گے۔
