خیرپور: پیپلزپارٹی کے سینئر رہنما منظور وسان کا کہنا ہے کہ پی پی، ن لیگ یا پی پی اور آزاد امیدوار مل کر حکومت بنائیں گے۔
اے آر وائی نیوز کے مطابق خیرپور میں میڈیا سے گفتگو کرتے ہوئے پیپلزپارٹی رہنما منظور وسان نے کہا کہ آزاد امیدوار ساتھ دیں گے تو وزیراعظم پیپلزپارٹی کا ہوگا، ہوسکتا ہے وزیراعظم آزاد امیدواروں میں سے ہو۔
انہوں نے کہا کہ میں نے پہلے ہی کہا تھا کہ الیکشن وقت پر ہوں گے اور آزاد امیدوار کامیاب ہوں گے۔
منظور وسان نے کہا کہ سندھ کے علاوں تینوں صوبوں میں مخلوط حکومت بنے گی، خوش قسمتی ہے پنجاب میں پی پی کے بغیر حکومت نہیں بن سکتی۔
واضح رہے کہ الیکشن کمیشن نے قومی اسمبلی کی 265 میں سے 255 نشستوں کے نتائج کا اعلان کردیا ہے۔
الیکشن کمیشن کا کہنا ہے کہ آزاد امیدوار 100، ن لیگ 73، پیپلزپارٹی 54 نشستوں پر کامیاب ہوئی ہے جبکہ ایم کیو ایم 17، جے یو آئی اور ق لیگ 3، 3 نشستوں پر کامیاب ہوئے ہیں۔
استحکام پاکستان پارٹی 2، مسلم لیگ ضیا، ایم ڈبلیو ایم اور بی این پی نے ایک، ایک نشست جیتی ہے۔
