کراچی: پیپلزپارٹی کے رہنما اور سابق وزیر اعلیٰ سندھ مراد علی شاہ کا کہنا ہے کہ ضرورت پڑی تو پیپلزپارٹی اپوزیشن میں بھی جاسکتی ہے۔
اے آر وائی نیوز سے خصوصی گفتگو کرتے ہوئے پی پی رہنما مراد علی شاہ کا کہنا ہے کہ سینٹرل ایگزیکٹو کمیٹی جو بھی فیصلہ کرے گی وہی ہوگا، ہماری لیڈر شپ مشورے کے ساتھ چلتی ہے، پیپلزپارٹی کے آپشنز بالکل اوپن ہیں۔
انہوں نے کہا کہ وزیر اعلیٰ سندھ کے لیے پیپلزپارٹی کی لیڈر شپ فیصلہ کرے گی۔
مراد علی شاہ نے کہا کہ ہمیں امید تھی کہ کراچی سے 8 سے 12 نشستیں لیں گے، ن لیگ کو کہیں بھی حکومت بنانے کے لیے آزاد امیدوار یا پی پی کی ضرورت ہوگی۔
پی پی رہنما نے کہا کہ ایم کیو ایم پاکستان کی اتنی نشستیں نکالنا ہمارے لیے سرپرائز ہے، ایم کیو ایم کو ملا کر بھی مسلم لیگ ن کی حکومت نہیں بنتی۔
مراد علی شاہ نے کہا کہ ایم کیو ایم کہتی ہے بلدیاتی حکومت ہمیں خیرات میں دی گئی، انہیں بتانا چاہتا ہوں آپ کی تو بلدیاتی انتخابات لڑنے کی پوزیشن ہی نہ تھی، بانی ایم کیو ایم جیسی زبان استعمال کریں گے تو آپ کے ساتھ اتحاد نہیں ہوسکتا۔
