کراچی: وزیر بلدیات سندھ ناصر حسین شاہ کا کہنا ہے کہ عمران خان کو سیاست کا کچھ علم نہیں ہے مگر بات وہ سیاست کی کرتے ہیں۔
اے آر وائی نیوز کے مطابق پاکستان پیپلزپارٹی کے رہنما ناصر حسین شاہ نے پی ٹی آئی چیئرمین عمران خان کے بیان پر ردعمل دیتے ہوئے کہا کہ معیشت پر ماہرین کو بات کرنے دیں آپ جھوٹ بولنے میں ماہر ہیں۔
انہوں نے کہا کہ انہیں الیکشن کی جلدی اس لیے ہے کہ اپنے خلاف کرپشن کیسز کھلنے سے خائف ہے، عمران خان توشہ خانہ کے تحائف میں کرپشن الزامات کا کوئی جواب نہیں دے پارہے ہیں۔
حکومت الیکشن قوانین میں اصلاحات، معیشت بحال کرکے انتخابات کروائے گی
ناصر شاہ نے کہا کہ حکومت الیکشن قوانین میں اصلاحات، معیشت بحال کرکے انتخابات کروائے گی۔
وزیر بلدیات سندھ نے کہا کہ عمران حکومت کو جو سپورٹ تھی اگر اہلیت ہوتی تو ملک آج اس حال میں نہ ہوتا، جب عمران خان کو اقتدار ملا تو سیاسی مخالفین کو جیلوں میں بند کرنے میں انہوں نے وقت گزارا۔
واضح رہے کہ اس سے قبل عمران خان کا کہنا تھا کہ پی ڈی ایم کی مخلوط حخومت نے آٹھ ماہ میں مہنگائی کو گیارہ سے چوبیس فیصد پر پہنچا دیا ہے۔
ان کا کہنا تھا کہ پی ٹی آئی نے وائٹ پیپر جاری کردیا ترسیلات زر نو اشاریہ چھ فیصد، برآمدات دو فیصد اور بیرونی سرمایہ کاری اکیاون اعشاریہ چار فیصد کم ہوئیں۔
عمران خان کا کہنا تھا کہ ملک میں مہنگائی گیارہ اعشار پانچ فیصد سے بڑھ کر تیئیس اعشاریہ آٹھ فیصد پر چلی گئی۔۔ ایکس چینج ریٹ ایک سو اٹھتر روپے انیس پیسے سے بڑھ کر دو سو چھبیس روپے سینتیس پیسے ہو گیا۔۔جولائی سے نومبر دو ہزار بائیس میں ایف بی آر نے 15.9 فیصد کا اضافی ٹیکس جمع کیا مگر نان ٹیکس ریونیو تیئیس اعشار چار فیصد کم ہوا۔
ان کا کہنا تھا کہ پی ایس ڈی پی چار سو باون ارب سے کم کر کے اٹھانوے ارب روپے کا کر دیا گیا جبکہ مالی خسارہ پانچ سو ستاسی ارب سے بڑھ کر بارہ سو چھیاسٹھ ارب روپے پر پہنچ گیا۔
