اسلام آباد: پاکستان پیپلز پارٹی نے سینیٹ اجلاس کیلیے جمع کروائی گئی ریکوزیشن مسترد ہونے پر چیئرمین سینیٹ صادق سنجرانی سے ایوان کا اجلاس بلانے کا مطالبہ کر دیا۔
تاج حیدر نے چیئرمین سینیٹ کو ریکوزیشن مسترد کرنے کے معاملے پر خط لکھ دیا جس میں کہا گیا ہے کہ سینیٹ سیکرٹریٹ نے فون پر بتایا کہ ریکوزیشن سے 5 اراکین نے دستخط واپس لیے، ان 5 اراکین کے نام پوچھے جو ہمیں نہیں بتائے گئے۔
خط کے مطابق کیا اراکین نے دستخط واپس لینے کیلیے تحریری طور پر سینیٹ سیکرٹریٹ کو لکھا؟ کیا سیکرٹریٹ نے ان اراکین سے تحریری طور پر دستخط واپس لینے کا کہا؟ آئین اور رولز کسی کو دستخط واپس لینے کا اختیار نہیں دیتے۔
تاج حیدر نے لکھا کہ چیئرمین سینیٹ یا سینیٹ سیکرٹریٹ فیصلہ کنندہ کا کردار کیسے ادا کر سکتا ہے؟ آئین چیئرمین سینیٹ آفس کو فیصلہ کنندہ ہونے کا اختیار نہیں دیتا، آئین کے تحت چیئرمین سینیٹ کا دستخط واپس لینے میں کوئی کردار نہیں۔
خط میں لکھا گیا کہ غربت، مہنگائی اور بیروزگاری کے باعث عوام کو شدید مشکلات کا سامنا ہے، عوام کو درپیش مشکلات کے دوران ایوان بالا بے حس نہیں بن سکتا، امید ہے کہ آپ ریکوزیشن مسترد کرنے کے فیصلے پر نظرثانی کریں گے، امید رکھتے ہیں کہ عوام کے مفاد میں آپ سینیٹ کا اجلاس بلائیں گے۔
