کراچی : کراچی پولیس آفس پر دہشت گردوں کے حملے کی ابتدائی تحقیقاتی رپورٹ سامنے آگئی، جس میں بتایا ایک دہشت گرد نے خود کو دھماکے سے اڑایا، دوسرے دہشت گرد کو رینجرزاور تیسرے کو پولیس نے جہنم واصل کیا۔
تفصیلات کے مطابق کراچی پولیس آفس پر دہشت گردوں کے حملے پر پولیس نے ابتدائی رپورٹ تیار کرلی۔
جس میں حملہ آوروں کے خلاف کارروائی کے حوالے سے بتایا گیا ہے، ذرائع نے بتایا کہ شام7 بجکر 10 منٹ پر 3 دہشت گرد پولیس اہلکار کو زخمی کرکے اندر داخل ہوئے۔
ذرائع کا کہنا ہے کہ ایس ایس پی ایسٹ زبیرنذیرنفری کے ہمراہ پہلے کے پی او میں داخل ہوئے، جس کے بعد ڈی آئی جیزناصرآفتاب،طارق دھاریجو اور مقدس حیدربھی5سے10منٹ میں پہنچے۔
ذرائع نے کہا کہ تینوں ڈی آئی جیز نے عمارت کی مختلف منزلوں پر آپریشن کی کمان سنبھالی، دوسری سے چوتھی منزل پر رینجرز کے بریگیڈیئر توقیرنے نفری کے ہمراہ آپریشن میں حصہ لیا۔
ذرائع کے مطابق چوتھی منزل پرایک دہشت گرد نے خود کو دھماکے سے اڑالیا جبکہ دوسرے دہشت گرد کو رینجرز جبکہ تیسرے کو پولیس نے جہنم واصل کیا۔
