پشاور : مسجد میں دھماکے کی ابتدائی تحریری رپورٹ تیار کرلی گئی ، جس میں بتایا گیا کہ خودکش دھماکا مسجد کے مین ہال میں ہوا اور دھماکے سے مسجد ہال کی چھت گر گئی۔
تفصیلات کے مطابق پشاور دھماکے کی ابتدائی تحریری رپورٹ مرتب کرلی گئی، جس میں بتایا گیا ہے کہ گزشتہ روز1 بجکر15 منٹ پر پشاور پولیس لائنز کی مسجد میں دھماکا ہوا۔
ابتدائی تحریری رپورٹ میں کہا گیا کہ دھماکہ نماز ظہر کے وقت مسجد کے مین ہال میں ہوا، جس سے مسجد کی چھت منہدم ہوگئی
رپورٹ میں بتایا ہے کہ مسجد کے ہال میں 300 سے 350 افراد کی گنجائش ہے جبکہ پولیس لائنز میں پشاور پولیس ہیڈ کوارٹر، ایف آر پی،ایلیٹ فورس ، سی ٹی ڈی اور دیگر محکمے ہیں۔
پاک آرمی اور ریسکیو1122 کی مدد سے آپریشن اور مختلف ٹیموں کی انویسٹی گیشن تاحال جاری ہے۔
گذشتہ روز پولیس لائنزدھماکے کی ابتدائی تحقیقاتی رپورٹ وزیراعظم کو پیش کی گئی تھی ، رپورٹ میں بتایا گیا کہ مسجد میں ہونے والا دھماکا خودکش تھا، جائے وقوعہ سےخود کش حملے کےشواہد ملےہیں۔
ابتدائی تحقیقات کے مطابق پولیس لائنز گیٹ، فیملی کوارٹرزسائیڈ کی سی سی ٹی وی فوٹیجز پر تحقیقات جاری ہے۔
ابتدائی رپورٹ میں بتایا گیا تھا کہ مسجد کے پلرگرنےسے چھت بیٹھی،جس کے باعث زیادہ جانی نقصان ہوا،واقعہ میں غفلت کا پہلو بھی پایا گیا ہے تاہم سیکیورٹی لیپس سےمتعلق اعلیٰ تحقیقاتی کمیٹی قائم کردی گئی ہے۔
