صدر عارف علوی آج وزیر اعلیٰ پنجاب چوہدری پرویز الہٰی سے اہم ملاقات کریں گے جس میں اسمبلیوں کی تحلیل ودیگر اہم سیاسی امور پر مشاورت ہوگی۔
اے آر وائی نیوز کے مطابق صدر مملکت ڈاکٹر عارف علوی آج وزیر اعلیٰ پنجاب چوہدری پرویز الہٰی سے اہم ملاقات کریں گے۔ جس میں اسمبلیوں کی تحلیل سمیت دیگر سیاسی امور پر بات ہوگی۔
صدر علوی وزیراعلیٰ پنجاب کی دعوت پر وزیر اعلیٰ سیکریٹریٹ جائیں گے۔ اس ملاقات کے دوران مونس الہٰی سمیت دیگر رہنما بھی شریک ہوں گے جب کہ چوہدری پرویز الہٰی کی جانب سے صدر مملکت کے اعزاز میں ظہرانہ بھی دیا جائے گا۔
ذرائع کا کہنا ہے کہ اس ملاقات میں وزیراعلیٰ پنجاب چوہدری پرویز الہٰی اسمبلیوں کی تحلیل سے متعلق صدر پاکستان کو اپنے موقف سے آگاہ کریں گے اور صوبے میں ترقیاتی کاموں پر بھی انہیں بریفنگ دیں گے۔
واضح رہے کہ گزشتہ روز پی ٹی آئی چیئرمین عمران خان کی جانب سے اسمبلیوں کی تحلیل کی تاریخ دینے کے اعلان کے بعد وفاقی وزرا نے صدر عارف علوی سے ملاقات کی تھی۔
صدر مملکت سے ملاقات کرنے والوں میں ایاز صادق اور اعظم نذیر تارڑ شامل تھے جنہوں نے عارف علوی کو ملکی معاملات پر کردار ادا کرنے کا مشورہ دیا تھا۔
وزرا کا کہنا تھا کہ اسمبلیاں تحلیل کے بجائے نظام کا حصہ رہ کر ملک کو مسائل سے نکالا جائے۔ اس پر صدر مملکت نے تمام سیاسی جماعتوں کو بالغ نظری کا مظاہرہ کرنے کا مشورہ دیا۔
