اسلام آباد : صدر مملکت عارف علوی نے چیف الیکشن کمشنر انتخابات سےمتعلق ہنگامی اجلاس کی دعوت دے دی اور بے حسی پر ناراضگی کا اظہار کیا۔
تفصیلات کے مطابق صدر مملکت عارف علوی نے چیف الیکشن کمشنر کو خط لکھا ،جس میں چیف الیکشن کمشنر کو انتخابات سےمتعلق ہنگامی اجلاس کی دعوت دی۔
20 فروری کو ایوان صدر میں سیکشن 57 ایک کے تحت الیکشن پر مشاورت کی دعوت دی گئی ہے۔
صدرمملکت نے خط میں کہا ہے کہ عام انتخابات کی تاریخ یاتاریخوں کااعلان کمیشن سےمشاورت کے بعد کریں گے ، معاملے پر عدالتی فیصلے اور حالیہ مشاہدات جیسی کچھ اہم پیشرفت ہوئی۔
عارف علوی نے الیکشن کمیشن کی جانب سے بے حسی پر ناراضگی کا اظہار کرتے ہوئے کہا الیکشن کمیشن نےابھی تک پہلے خط کا جواب نہیں دیا، انتظار کررہاتھا کہ کمیشن آئینی فرائض کااحساس کرے گا اور اس کے مطابق کام کرےگا۔
خط میں کہا گیا کہ اہم معاملے پر الیکشن کمیشن کے افسوسناک رویے سےانتہائی مایوسی ہوئی ، آئینی ذمہ داری کا احساس کرتے ہوئے چیف الیکشن کمشنر کو الیکشن پرمشاورت کیلئے مدعو کرتا ہوں۔