The news is by your side.

Advertisement

صدر عارف علوی کا امیر کویت کے انتقال پر اظہار افسوس

اسلام آباد: صدر مملکت ڈاکٹر عارف علوی نے کویت کے امیر صباح الاحمد الجابر الصباح کے انتقال پر اظہار افسوس کیا ہے۔

اے آر وائی نیوز کے مطابق صدر مملکت نے امیر کویت کے انتقال پر آل صباح اور اہل کویت سے اظہارِ ہمدردی کرتے ہوئے مرحوم کے درجات کی بلندی کی دعا کی۔

صدر عارف علوی نے کہا کہ پاک کویت تعلقات کے لیے مرحوم نے گراں قدر خدمات انجام دیں۔

واضح رہے کہ گزشتہ روز امیر کویت شیخ صباح الاحمد الجابر الصباح طویل علالت کے باعث دار فانی سے کوچ کر گئے ہیں، ان کا انتقال کل دوپہر کو 91 برس کی عمر میں امریکا میں ہوا، شیخ صباح رواں برس جولائی میں علاج کی غرض سے امریکا منتقل ہوئے تھے، اس سے قبل ان کی کویت میں بھی سرجری ہوئی تھی۔

امیرکویت انتقال کرگئے

شیخ صباح الاحمد نے 2006 میں تیل کی دولت سے مالا مال عرب ریاست کویت کے امیر کا منصب سنبھالا تھا جب کہ اس سے قبل 50 برس سے ریاست کے خارجہ امور و پالیسیاں دیکھ رہے تھے۔ وہ 1963 سے 1991 تک کویت کے وزیر خارجہ رہے جب کہ 1993 میں انھیں دوبارہ کویت کے وزیر خارجہ کا منصب سونپ دیا گیا جو 2003 تک ان کے پاس رہا۔

امیر صباح الاحمد الجابر کے انتقال کے بعد کویت کے ولی عہد شیخ نواف الاحمد الجابر الصباح کو ملک کا نیا امیر مقرر کر دیا گیا ہے۔ کویت کے نئے امیر کی عمر 83 سال ہے جب کہ وہ سابق سربراہ کے سوتیلے بھائی ہیں۔

امیرِ کویت کے انتقال پر حکومت نے چالیس روزہ جب کہ متحدہ عرب امارات سمیت دیگر ممالک نے تین روزہ سوگ کا اعلان کیا ہے۔

Comments

یہ بھی پڑھیں