اسلام آباد : ایم ڈی کیٹ میں نقل کے حوالے سے اہم انکشاف سامنے آگیا نقل کے آلات کے استعمال کی پیشگی اطلاعات تھیں۔
تفصیلات کے مطابق صدر پی ایم ڈی سی نے ایم ڈی کیٹ میں نقل کے حوالے سے اہم انکشاف کرتے ہوئے کہا کہ ایم ڈی کیٹ میں نقل کے آلات کے استعمال کی پیشگی اطلاعات تھیں، سیکورٹی ایجنسیز نے نقل آلات استعمال کی اطلاع 19 ستمبر کو دی تھی، ایک گروہ کی جانب سے نقل آلات استعمال کی اطلاعات ملی تھیں۔
پروفیسر رضوان تاج کا کہنا تھا کہ سکیوریٹی ایجنسیز سے نقل مافیا کو بے نقاب کرنے کی درخواست کی تھی ، نقل مافیا کے حوالے سے سیکورٹی ایجنسیز سے مسلسل رابطہ تھا ، سیکورٹی ایجنسیز نے نقل کی روک تھام کیلئے سخت اقدامات یقینی بنائے۔
صدر پی ایم ڈی سی نےبتایا کہ نقل مافیا کے خلاف سیکورٹی ایجنسیز کے تعاون سے فوری کارروائیاں کیں اور نقل آلات کے ممکنہ استعمال کے پیش نظر سخت حفاظتی اقدامات کئے جبکہ ایم ڈی کیٹ کے امتحانی مراکز میں جا کر مانیٹرنگ کی۔
ڈاکٹر تاج نے ذاتی طور پر کئی امتحانی مراکز کا دورہ کیا اور کہا کہ ایم ڈی کیٹ کا شفاف انعقاد یقینی بنانے کیلئے بھرپور اقدامات کئے ، سوشل میڈیا پر ایم ڈی کیٹ پرچہ لیک ہونے کی خبر افواہ تھی، ایم ڈی کیٹ پرچہ لیک ہونے کی افواہ خوف پھیلانے کی کوشش تھی ۔
ان کا کہنا تھا کہ ایم ڈی کیٹ پرچہ لیک ہونے کی افواہ کی تحقیقات کی گئیں، تحقیقات میں پرچہ لیک ہونے کے ٹھوس شواہد نہیں ملے،سوشل میڈیا پر پرچہ لیک کی افواہ اڑانے کا مقصد ایم ڈی کیٹ کو متاثر کرنا تھا، طلبہ اور والدین ایم ڈی کیٹ نظام کی شفافیت پر بھروسہ کریں۔
پی ایم ڈی سی نے ایم ڈی کیٹ بارے جھوٹا پراپیگنڈا کرنے والوں کے خلاف کارروائی کا اعلان کرتے ہوئے کہا کہ ایم ڈی کیٹ امتحانی عمل کو بدنام کرنے والوں کے خلاف کارروائی ہوگی اور امتحان کے بارے جھوٹ پھیلانے والوں کے خلاف قانونی کارروائی ہو گی۔
