علی گڑھ: بھارتی کسانوں نے حکومت کو دھمکی دی ہے کہ آلو کی قیمت بدلیں، ورنہ آپ کو بدل دیں گے۔
بھارتی میڈیا کے مطابق بھارتی ریاست اتر پردیش کی یوگی حکومت نے آلو کی قیمت کسانوں کی توقع سے بہت کم طے کر دی ہے، جس کے باعث علی گڑھ کے کسان ناراض ہو گئے ہیں۔
بھارتی میڈیا کا کہنا ہے کہ علی گڑھ میں اس مرتبہ آلو کی اچھی فصل ہوئی ہے، تاہم کسان مایوس دکھائی دے رہے ہیں، کیوں کہ ریاستی حکومت نے آلو کی قیمت 650 روپے فی کوئنٹل کے حساب سے طے کر دی ہے جو کسانوں کی توقع سے بہت کم ہے۔
کسانوں کا کہنا ہے کہ حکومتی قیمت پر آلو فروخت کرنا ان کے لیے خسارے کا سودا ہے، اس لیے حکومت کو چاہیے کہ اس قیمت کو بدلے، کسانوں نے یہاں تک کہہ دیا ہے کہ آلو کی قیمت نہیں بدلی گئی تو اگلی بار حکومت بدلی جائے گی۔
بھارتی میڈیا کے مطابق اگر حکومت نے کسانوں کو آلو کی فصل کا مناسب ریٹ نہیں دیا تو سماجوادی پارٹی کے رہنما اکھلیش یادو کی وہ بات سچ نکلے گی جس میں انھوں نے کہا تھا کہ آلو کی قیمت ہی حکومت کو گرائے گی۔
کسانوں کا کہنا ہے کہ منڈیوں میں آلو کی قیمت مٹی جیسی ہو گئی ہے، مناسب قیمت نہ ملنے سے کسانوں کے لیے پریشانی پیدا ہو رہی ہے۔
کسانوں نے اپنی مایوسی کا اظہار میڈیا کے سامنے کرتے ہوئے کہا ہے کہ 650 روپے فی کوئنٹل قیمت ہونے سے کسانوں کو کم از کم 500 سے 600 روپے تک کا خسارہ ہوگا۔
