روالپنڈی: وزیراعظم شاہد خاقان عباسی اور آرمی چیف آف اسٹاف جنرل قمر جاوید باجوہ نے ایل او سی کا مشترکہ دورہ کیا جہاں پاک فوج کے جوانوں نے بھارتی اشتعال انگیزی پر بریفنگ دی۔
پاک فوج کے تعلقاتِ عامہ سے جاری بیان میں کہا گیا ہے کہ وزیراعظم شاہد خاقان عباسی اور آرمی چیف نے لائن آف کنٹرول کا دورہ کیا جہاں انہیں ایل او سی کی صورتحال پر بریفنگ دی گئی۔ پاک فوج نے وزیراعظم کو بھارتی فوج کی جانب سے کی جانے والی خلاف ورزیوں سے آگاہ کیا۔
وزیر اعظم شاہد خاقان عباسی نے بھارتی فوج کی معصوم شہریوں کو نشانہ بنانے پر شدید مذمت کرتے ہوئے کہا کہ کشمیریوں کی اخلاقی، سیاسی و سفارتی حمایت جاری رکھیں گے۔
وزیر اعظم نے کہا کہ دنیا کی کوئی فوج پاک فوج کے ہم پلہ نہیں، دہشت گردی کے خلاف اور امن کی بحالی میں فوج کی قربانیاں گراں قدر ہیں۔
آئی ایس پی آر کے مطابق وزیر اعظم نے علاقے کی فلاح کے لیے فنڈز کا بھی اعلان کیا، شاہد خاقان عباسی نے ایل او سی پر شہریوں کی حفاظت کے لیے بنکرز کی تعمیر تیز کرنے کی ہدایت کی۔
PM & COAS visited LOC. "Pakistan shall continue its political, diplomatic and moral support to Kashmiris for their just struggle”, PM. (1/2) pic.twitter.com/KjXmztLsOB
— Maj Gen Asif Ghafoor (@OfficialDGISPR) November 10, 2017
پاک فوج کے شعبہ تعلقات عامہ سے جاری بیان کے مطابق آرمی چیف جنرل قمر جاوید باجوہ نے بھارتی اشتعال انگیزی سے ٹانگوں سے محروم بچی کے علاج کا اعلان کیا، بچی کا مسلح افواج کے بحالی مرکز میں علاج کرایا جائے گا۔
اس موقع پر وزیر اعظم آزاد کشمیر راجہ فاروق حیدر بھی شاہد خاقان عباسی کے ہمراہ تھے، کور کمانڈر راولپنڈی لیفٹیننٹ جنرل ندیم رضا بھی موجود تھے۔
