وزیراعظم شہباز شریف دو روزہ دورے پر ترکیہ روانہ ہوگئے ہیں وہ صدر رجب طیب اردوان کی دعوت پر ترکیہ کا دورہ کر رہے ہیں۔
اے آر وائی نیوز کےمطابق وزیراعظم شہباز شریف دو روزہ دورے پر ترکیہ روانہ ہوگئے ہیں۔ وہ ترک صدر رجب طیب اردوان کی دعوت پر دورہ کر رہے ہیں۔ شہباز شریف استنبول شپ یارڈ میں تیسرے پی ایس ایس خیبر کا افتتاح کریں گے۔
دورے کے دوران ترک صدر رجب طیب اردوان اور وزیراعظم شہباز کے مابین دو طرفہ تعلقات پر تبادلہ خیال ہوگا اور علاقائی صورتحال و مشترکہ دلچسپی کے امور پر گفتگو کی جائے گی۔
وزیراعظم اس دورے کے دوران ترک تاجروں سے بھی ملاقات کریں گے۔
روانگی کے موقع پر وزیراعظم شہباز شریف نے اپنے ٹوئٹ میں کہا کہ ترک صدر کی دعوت پر ترکی کے 2 روزہ دورے پر روانہ ہو رہا ہوں۔ تیسرے پی این ایس خیبر کا افتتاح دونوں ممالک میں دفاعی تعاون کی نمائندگی کرتا ہے۔
شہباز شریف نے مزید کہا کہ اعلیٰ سطح کے تبادلے ہماری شراکت کی ایک واضح خصوصیت ہیں۔ دو طرفہ تعلقات اسٹریٹجک شراکت داری کے نئے دور میں داخل ہوگئے۔
Leaving for 2-day visit to Türkiye at the invitation of my brother H.E. President Tayyip Erdogan. Inauguration of third MILGEM Corvette Ship represents deepening of defence cooperation b/w our two brotherly countries. High level exchanges are a defining feaure of our partnership.
— Shehbaz Sharif (@CMShehbaz) November 25, 2022
یاد رہے رواں سال ستمبر میں وزیراعظم شہبازشریف سے ترکیہ کے صدر رجب طیب اردوان کی سمرقند میں ملاقات ہوئی تھی، ملاقات میں دونوں رہنماؤں نے باہمی دلچسپی اور بین الاقوامی امور پر تبادلہ خیال کیا۔
ترک صدر کیساتھ ملاقات میں وزیراعظم نے پاکستان ترکیہ ’’ٹریڈ ان گُڈز‘‘ کے معاہدے پر دستخط کا خیرمقدم کرتے ہوئے سیلاب کے بعد ترکیہ کی طرف سے یکجہتی اور فراخدلی سے تعاون پر شکریہ ادا کیا تھا۔