لندن: برطانیہ کی نیشنل ہیلتھ سروس (این ایچ ایس) کے لیے لاکھوں پاؤنڈز کی خطیر رقم جمع کرنے والے سابق فوجی کیپٹن ٹام مور کو اس وقت ہیرو مانا جارہا ہے، کیپٹن کو برطانوی شہزادے ولیم نے بھی خفیہ طور پر رقم روانہ کی تھی۔
برطانیہ کے شاہی محل نے اس بات کی تصدیق کی ہے کہ شہزادہ ولیم نے کیپٹن ٹام مور کو ایک خطیر رقم عطیہ کی ہے جسے اب تک ظاہر نہیں کیا گیا تھا۔
شہزادہ ولیم نے اپنے گھر سے ریکارڈڈ ایک ویڈیو میں کیپٹن کی تعریف اور شکریہ ادا کرتے ہوئے کہا تھا کہ 99 سالہ کیپٹن کے جذبے سے تمام لوگ بہت متاثر ہوئے ہیں۔
انہوں نے کہا کہ کیپٹن عطیات جمع کرنے والی مشین بن گئے ہیں اور خدا ہی جانتا ہے کہ ان کی عطیہ کی گئی رقم کتنی ہوگی۔ شہزادے کی کزن شہزادی یوجنی نے بھی ٹویٹر پر کیپٹن کی تعریف کرتے ہوئے ان کا شکریہ ادا کیا۔
دوسری جانب این ایچ ایس کا اسٹاف بھی کیپٹن کا بے حد مشکور ہے۔
ادھر برطانوی وزیر اعظم بورس جانسن کے ترجمان نے کہا ہے کہ وزیر اعظم اس بات پر غور کر رہے ہیں کہ کیپٹن مور کی خدمات کا کیسے اعتراف کیا جائے۔
ترجمان کا کہنا ہے کہ فوج میں اپنی خدمات سے لے کر، ریٹائرمنٹ کے بعد این ایچ ایس اسٹاف کی مدد کرنے تک، ٹام کی خدمات ناقابل فراموش اور قابل تقلید ہیں۔
خیال رہے کہ دوسری جنگ عظیم میں برطانوی فوج کی جانب سے لڑنے والے ٹام مور نے این ایچ ایس کے لیے 90 لاکھ پاؤنڈز سے زائد کی رقم جمع کرلی۔
کیپٹن ٹام نے اپنے گارڈن میں واک کرتے ہوئے شہریوں سے فنڈز کی اپیل کی جس پر عوام کا بھرپور رد عمل آیا اور دیکھتے ہی دیکھتے 90 لاکھ پاؤنڈز سے زائد کی رقم اکٹھا ہوگئی۔
کیپٹن ٹام نے اپنے گھر کے گارڈن کے 100 چکر پورے کر کے 1 ہزار پاؤنڈز جمع کرنے کا ہدف بنایا تھا لیکن عوام نے پیسوں کے ڈھیر لگا دیے، ٹام 30 اپریل کو 100 برس کے ہوجائیں گے، ان کی ہمت اور جذبے کے باعث برطانوی عوام نے انہیں ہیرو قرار دیا ہے۔
