کراچی : آپ سچی لگن کے ساتھ تعلیم حاصل کرنا چاہیں تو جیل میں بھی پڑھ لکھ سکتے ہیں، اس کی ایک روشن مثال سینڑل جیل کراچی کا قیدی ہے کہ جس کو اسکالر شپ کی پیشکش ہوئی ہے۔
کراچی سینٹرل جیل میں قتل کے سزا یافتہ مجرم نے جیل میں رہتے ہوئے تعلیمی میدان مار لیا، قتل کے قیدی مجرم کو چارٹرڈ اکاؤنٹنٹ کی اسکالر شپ کی پیشکش کی گئی ہے۔
اس حوالے سے سینٹرل جیل انتظامیہ کا کہنا ہے کہ انٹرمیڈیٹ امتحانات میں بازی لے جانے والے مجرم نعیم شاہ کو آئی سی اے پی نے اسکالر شپ آفر کی ہے۔
انتطامیہ کے مطابق مجرم نعیم شاہ کو قتل کیس میں 25سال کی سزا ہوئی ہے جبکہ اب تک نعیم شاہ گیارہ سال کی سزا مکمل کرچکا ہے۔
نعیم شاہ نے پرائیویٹ امیدوار کے طور پر86اعشاریہ 73 مارکس کے ساتھ اے ون گریڈ حاصل کیا اور اس نے بنیادی تعلیم بھی جیل میں رہتے ہوئے حاصل کی، سینٹرل جیل انتظامیہ کے مطابق مجرم نعیم شاہ انٹرمیڈیٹ کے امتحانات میں ٹاپ 20 میں آیا ہے۔
