ممبئی: معروف بالی وڈ فلمساز پریادرشن نے مقبول کامیڈی فرنچائز ’ہیرا پھیری‘ کی تیسری پیشکش سے متعلق مداحوں کو خوشخبری سنا دی۔
انڈین میڈیا کی رپورٹس کے مطابق ہیرا پھیری 3 کا اعلان 2023 میں بھی کیا گیا تھا لیکن ساتھ میں یہ خبر بھی آئی تھی کہ اکشے کمار اس کا حصہ نہیں ہوں گے، اداکار نے خود ایک تقریب میں بھی اس کی تصدیق کی تھی۔
تاہم آج اپنی سالگرہ کے موقع پر فلمساز پریادرشن نے اعلان کیا کہ وہ ہیرا پھیری 3 پر کام کر رہے ہیں۔
یہ بھی پڑھیں: ’اکشے کمار کی لگام کھینچ کر رکھنا‘
اکشے کمار نے انسٹاگرام اکاؤنٹ پر پریادرشن کو سالگرہ کی مبارکباد پیش کی اور لکھا کہ سالگرہ کا جشن ایک سیٹ پر پورا دن گزارنے سے بہتر کیا ہو سکتا ہے۔
پریادرشن نے اداکار کی پوسٹ کو انسٹاگرام اسٹوری پر شیئر کرتے ہوئے لکھا کہ آپ کی نیک خواہشات کا بہت بہت شکریہ، میں بدلے میں آپ کو ایک تحفہ دینا چاہوں گا کہ میں ہیرا پھیری 3 کرنے کو تیار ہوں، کیا آپ تیار ہیں؟
فلمساز نے اسٹوری پر اداکار سنیل شیٹی اور پاریش راول کو بھی ٹیگ کیا۔
جواب میں اکشے کمار نے حیران ہو کر لکھا آپ کی سالگرہ اور مجھے اپنی زندگی کا بہترین تحفہ مل گیا، چلو کرتے ہیں پھر تھوڑی ہیرا پھیری۔
ادھر، پریش راول نے ایکس پر لکھا کہ آپ وہ ماں ہیں جو دنیا میں خوشیاں لائیں، خوش آمدید جناب اور دنیا کو پھر سے خوش رکھیں۔
سنیل شیٹی نے اپنے جوش و خروش کو شیئر کرتے ہوئے لکھا ہیرا پھیری اور پوچھ پوچھ۔۔ آئیے کرتے ہیں۔
