اسلام آباد: ہر سال بارشوں میں راولپنڈی کو سیلاب میں ڈبو دینے والے نالہ لئی کے منصوبے کا کام دوبارہ شروع کیا جارہا ہے۔ وزیر اعظم نے وفاقی وزیر ریلوے کو منصوبے کا فوکل پرسن مقرر کردیا۔
تفصیلات کے مطابق وزیر اعظم عمران خان نے وفاقی وزیر ریلوے شیخ رشید کو نالہ لئی ایکسپریس وے منصوبے کا فوکل پرسن مقرر کردیا۔ ترجمان ریلوے کے مطابق شیخ رشید فلڈ چینل پروجیکٹ کے بھی فوکل پرسن ہوں گے۔
ترجمان ریلوے کا کہنا ہے کہ نالہ لئی منصوبہ سابق صدر پرویز مشرف کے دور میں شروع کیا گیا تھا۔ پرویز مشرف کے بعد حکومتوں نے نالہ لئی منصوبہ روک دیا تھا۔
ترجمان نے مطابق نالہ لئی منصوبے کی ابتدائی لاگت 18 ارب روپے تھی، منصوبے کے تحت نالہ لئی کے دونوں اطراف سگنل فری سڑکیں تعمیر کی جائیں گی۔ نالہ لئی منصوبے سے جڑواں شہروں میں ٹریفک مسائل کے حل میں مدد ملے گی۔
ترجمان کا مزید کہنا تھا کہ نالہ لئی منصوبے سے راولپنڈی میں سیلاب کی بھی روک تھام ہوسکے گی۔
خیال رہے کہ راولپنڈی میں واقع نالہ لئی بارشوں کے موسم میں بھر جاتا ہے اور نالے میں طغیانی آجاتی ہے جس کے باعث پانی سیلابی صورت میں آس پاس کی آبادیوں میں داخل ہوجاتا ہے۔
