پی ایس ایل 10 کا آج سے آغاز ہو رہا ہے لیگ کے دوران پنڈی شہر میں میٹرو بس سروس کب کب بند رہے گی اس حوالے سے اعلان کر دیا گیا ہے۔
دنیا کی مقبول ترین لیگ میں سے ایک پاکستان سپر لیگ (پی ایس ایل) کے دسویں ایڈیشن کا آغاز آج سے ہو رہا ہے۔ ٹورنامنٹ کا رنگا رنگ افتتاح اور پہلا میچ پنڈی کرکٹ اسٹیڈیم میں کھیلا جائے گا۔
پی ایس ایل میچوں کے درمیان پنڈی میں چلنے والے میٹرو بس سروس کن اوقات میں بند رہے گی۔ اس حوالے سے انتظامیہ نے اعلان کر دیا ہے۔
انتظامیہ کے مطابق پی ایس ایل میچز میں ٹیموں کی آمدورفت کے دوران میٹرو بس سروس بند رہے گی۔
اعلامیہ میں کہا گیا ہے کہ میٹرو بس سروس صدر سے پاک سیکریٹریٹ تک ٹیم کی آمدورفت کے دوران بند رہےگی۔ اس بندش کی وجہ سے فیض آباد، ختم نبوت چوک، رحمان آباد اسٹیشن بند رہیں گے۔
PSL 10- پی ایس ایل کی تمام خبریں
واضح رہے کہ پی ایس ایل 10 کی افتتاحی تقریب کے بعد پہلا میچ دفاعی چیمپئن اسلام آباد یونائیٹڈ اور دو بار کی چیمپئن لاہور قلندرز کے مابین کھیلا جائے گا۔
6 ٹیموں کے ٹورنامنٹ میں 11 اپریل سے 18 مئی تک 34 میچز کھیلے جائیں گے۔
لاہور کا قذافی اسٹیڈیم 13 میچز کی میزبانی کرے گا جن میں 2 ایلیمنیٹر اور فائنل بھی شامل ہے۔
راولپنڈی کرکٹ اسٹیڈیم میں 11 میچز کھیلے جائیں گے جس میں 13 مئی کو ہونے والا پہلا کوالیفائر بھی شامل ہیں جبکہ کراچی کا نیشنل اسٹیڈیم اور ملتان کرکٹ اسٹیڈیم 5، پانچ میچوں کی میزبانی کریں گے۔
بابر اعظم، شاداب خان، محمد رضوان اور شاہین شاہ آفریدی بالترتیب پشاور زلمی، اسلام آباد یونائیٹڈ، ملتان سلطانز اور لاہور قلندرز کی قیادت جاری رکھیں گے، جب کہ کراچی کنگز اور کوئٹہ گلیڈی ایٹرز بالترتیب ڈیوڈ وارنر اور سعود شکیل کے ساتھ نئے کپتان ہوں گے۔
پی ایس ایل 10: کراچی میچز کیلیے سیکیورٹی پلان تیار، کون کون سی سڑکیں بند ہوں گی؟
