پاکستان سپر لیگ سیزن 10 کے لیے ایونٹ کی مقبول ترین ٹیم کراچی کنگز کے کھلاڑی جمع ہونا شروع ہو گئے۔
دنیا کی بترین لیگز میں سے ایک پاکستان سپر لیگ کے دسویں سیزن کا آغاز 11 اپریل سے ہو رہا ہے جس کے لیے کراچی کنگز کے کھلاڑیوں نے اسکواڈ کو جوائن کرنا شروع کر دیا ہے۔
عباس آفریدی، ریاض اللہ، فواد علی اور حسن علی کراچی پہنچ گئے ہیں۔ عامر جمال، زاہدمحمود، عرفات منہاس نے اسکواڈ کو جوائن کر لیا ہے۔
مرزا مامون اور عمیربن یوسف نے بھی رپورٹ کر دیا ہے جب کہ ہیڈکوچ روی بوپارا بھی آج رات کراچی پہنچیں گے۔ فاسٹ بولنگ کوچ شان ٹیٹ صبح کی فلائٹ سےکراچی پہنچیں گے۔ کراچی کنگز کاٹریننگ کیمپ کل سے نیشنل اسٹیڈیم کراچی میں لگےگا۔
ٹیم کی نئی کٹ متعارف کرا دی گئی ہے۔ اس موقع پر کراچی کنگز کے آفیشل انسٹا گرام سوشل میڈیا پلیٹ فارم سے جیبلی (Ghibli) اسٹائل کے رنگ میں رنگے کھلاڑیوں کی دلکش تصاویر جاری کی گئی ہیں۔
ان تصاویر میں کراچی کنگز کے کپتان ڈیوڈ وارنر سمیت نامور کھلاڑیوں کین ولیمسن، شان مسعود، ٹم سیفرٹ، خوشدل شاہ، عرفان خان نیازی اور دیگر کو مختلف ایکشن میں دکھایا گیا ہے۔
