کراچی: پاکستان سپر لیگ سیزن فور میں کراچی کنگز کے شیر پندرہ فروری سے پنجہ آزمائی کریں گے، کھلاڑی عمدہ کارکردگی دکھانے کے لیے پرعزم ہیں۔
تفصیلات کے مطابق کراچی کنگز کے شیر میدان مارنے کے لیے تیار ہوگئے، سب پر بازی لے جانے کے لیے کراچی کنگز کے کپتان عماد وسیم نیشنل اسٹیڈیم کراچی میں بہترین کھیل پیش کرکے شائقین کے دل جیت کے لیے پر جوش ہیں۔
کراچی کنگز کے شیر پندرہ فروری کو دبئی میں دھاڑیں گے، پہلا مقابلہ چھٹی ٹیم سے ہوگا، دوسرے میچ میں سولہ فروری کو لاہور قلندر سے ٹکرائیں گے۔
اکیس فروری کو کراچی کی ٹیم کا پشاور زلمی سے ظالم مقابلہ ہوگا، کراچی کنگز اور دومرتبہ کی چیمپئین اسلام آباد یونائٹیڈ کے درمیان ٹاکرا تئیس فروری کو شیڈول ہے۔
پی ایس ایل چوتھا ایڈیشن: کراچی کنگز میں اس بار کون سے کھلاڑی شامل ہیں، فہرست جاری
چوبیس فروری کو کراچی کے شیر کوئٹہ گلیڈی ائیٹر پر جھپٹیں گے، ستائیس فروری سے دس مارچ کے دوران کراچی کنگز کے شیر ٹیموں سے دوسری بار ٹکرائیں گے۔
خیال رہے کہ پاکستان سپر لیگ کی سب سے مقبول ٹیم کراچی کنگز نے سیزن فور کے لیے اپنے آٹھ سپر اسٹارز کھلاڑیوں کو اس سال بھی برقرار رکھا ہے۔
جاری ہونے والی فہرست میں پلاٹینئیم کٹیگری سے نیوزی لینڈ کے کولن منرو، فاسٹ بولر محمد عامر، ٹی ٹوئنٹی اسپیشلسٹ بابر اعظم سیزن فور کے لئے بھی کراچی کنگز کا ہی حصہ رہیں گے۔
واضح رہے کہ کراچی کنگز نے سلور کٹیگری سے کسی کھلاڑی کو برقرار نہیں رکھا۔ اس کے علاوہ دیگر پانچ فرنچائز نے بھی برقرار رکھے گئے کھلاڑیوں کی فہرست جاری کردی ہے۔
