لاہور: پاکستان سپر لیگ (پی ایس ایل) کے سیزن فائیو میں حصہ لینے والے دنیا کے نامور کھلاڑی بھی پاکستان آنے کو تیار ہیں۔
تفصیلات کے مطابق ہر سال کی طرح امسال ہونے والے پی ایس ایل کے سیزن میں انگلینڈ کے 7، جنوبی افریقا کے 6، ویسٹ انڈیز کے 5، آسٹریلیا اور افغانستان کے تین تین، سری لنکا کے دو جبکہ نیپال اور نیوزی لینڈ کے ایک ایک کھلاڑی ایکشن میں نظر آئیں گے۔
اطلاعات کے مطابق افغانستان کے کھلاڑی محمد نبی، مجیب الرحمان اور راشد خان ڈارفٹنگ کے لیے دستیاب ہوں گے اسی طرح آسٹریلیا کے ڈین کرسٹن، بین کٹنگ اور کرس لین بھی پاکستان میں کھیلنے کو تیار ہیں۔
دفاعی چیمپئن انگلینڈ کے معین علی، ہیری گرنی، ایلکس ہیلز، کرس جارڈن، لیام پلنکٹ، عادل رشید اور جیسن رائے نے بھی پاکستان میں کھیلنے کی حامی بھر لی، اسی طرح نیپال کے سندیپ لمیچانے اورنیوزی لینڈ کے کولن منرو بھی پی ایس ایل میں ایکشن دکھائیں گے۔
جنوبی افریقاکی ٹیم کے کھلاڑی ہاشم آملہ، جے پی ڈومنی، کولن انگرام، ریلے روسو، ڈیل اسٹین اور عمران طاہر بھی پاکستانی میدانوں میں ایکشن دکھائی گے جبکہ سری لنکا کے اینجلو میتھیوز اور تھیسارا پریرا بھی رواں سال پی ایس ایل کا حصہ بنیں گے۔
ویسٹ انڈیز کے کارلوس بریتھ ویٹ، ڈائن براوؤ، ایون لوئس، سنیل نارائن اور کیورن پولارڈ بھی پی ایس ایل سیزن فائیو میں ایکشن میں نظر آئیں گے۔
ایچ بی ایل پی ایس ایل کی جانب سے جاری ہونے والے اعلامیے کے مطابق ڈیل اسٹین کے علاوہ ورلڈکپ کی فاتح ٹیم انگلینڈ کے معین علی، عادل رشید اور جیسن رائے سمیت 28 غیر ملکی کھلاڑیوں کو پلاٹینم کٹیگری میں شامل کرلیا گیا۔ پی سی بی کی جانب سے پلاٹینم کٹیگری میں شامل کھلاڑیوں کی مکمل فہرست 21 نومبر کو رجسٹریشن ونڈو بند ہونے کے بعد جاری کی جائے گی۔
یاد رہے کہ ڈیل اسٹین پہلی بار پی ایس ایل کا حصہ بن رہے ہیں،جنوبی افریقا کے مایہ ناز فاسٹ باؤلر کی شمولیت سے 2016 میں شروع ہونے والی لیگ کی تیزی سے بڑھتی مقبولیت کا اندازہ لگایا جاسکتا ہے۔
پی ایس ایل 2020 کے بارے میں چند ضروری باتیں
ابتدائی فہرست میں شامل کھلاڑیوں کی تعداد میں آئندہ ہفتے اضافے کا امکان ہے، ڈرافٹ پول کے لیے کھلاڑیوں کوطے شدہ کٹیگریز میں ری ٹین، ٹریڈ اور ریلیز کیا جاسکتا ہے۔
پانچویں سیزن میں بھی پلاٹینم، ڈائمنڈ، گولڈ، سلور اور ایمرجنگ پانچ کٹیگریز بنائی گئیں، ہر فرنچائز کم از کم 16 اور زیادہ سے زیادہ 18 کھلاڑیوں کو لے سکتی ہے، فرنچائز مالکان پر ضروری ہے کہ وہ پلاٹینیم، ڈائمنڈ، گولڈ سے تین تین جبکہ سلور سے پانچ ، ایمرجنگ اور سپلیمنٹری سے دو کھلاڑیوں کا انتخاب کریں۔
