پی ایس ایل 9 کی رنر اپ ملتان سلطانز کے ہیڈ کوچ عبدالرحمان نے کہا ہے کہ افتخار احمد ڈیتھ اوور کا بہترین کھلاڑی ہے لیکن انہیں درست انداز میں نہیں کھلایا گیا۔
اے آر وائی نیوز کے مطابق اسلام آباد یونائیٹڈ نے تیسری بار پی ایس ایل چیمپئن بننے کا اعزاز حاصل کر لیا۔ نیشنل اسٹیڈیم کراچی میں کھیلے گئے فائنل میچ میں ملتان سلطانز کو 2 وکٹوں سے شکست دے کر اسلام آباد کے کپتان شاداب خان نے ٹرافی اٹھائی۔
میچ کے بعد گفتگو کرتے ہوئے رنر اپ ٹیم ملتان سلطانز کے ہیڈ کوچ عبدالرحمان نے کہا کہ افتخار احمد ڈیتھ اوور کا بہترین کھلاڑی ہے لیکن وہ جتنی بھی فرنچائز کے ساتھ کھیلے انہیں درست انداز سے نہیں کھلایا گیا تاہم ہم نے ان کی صلاحیتوں سے بھرپور فائدہ اٹھایا۔
عبدالرحمان نے کہا کہ ہماری ٹیم نے پی ایس ایل میں عمدہ کارکردگی دکھائی، ہماری حکمت عملی ہر میچ کے لحاظ سے اچھی رہی، کچھ چیزوں میں بہتری کی ضرورت ہے جس پر ہم کام کریں گے، ڈیوڈ ویلی کو اس لیے اوپر بھیجا تاکہ وہ اسپن اٹیک کو بریک کر سکے، تاہم بعض اوقات کچھ فیصلے حق میں ہوتے ہیں اور کچھ نہیں۔
ملتان سلطانز کے ہیڈ کوچ نے کہا کہ قومی ٹیم کی کوچنگ کے حوالے سے کہا کہ ان سے پاکستان کرکٹ تیم کی کوچنگ کے لیے رابطہ نہیں کیا گیا ہے۔
