اسلام آباد : پاکستان ٹیلی کمیونیکیشن اتھارٹی کا کہنا ہے کہ ٹیلی کام شعبے میں مالی سال 2022-21 میں 694 ارب ریونیو حاصل ہوا۔
تفصیلات کے مطابق پاکستان ٹیلی کمیونیکیشن اتھارٹی (پی ٹی اے) نے سالانہ رپورٹ جاری کردی۔
جس میں بتایا گیا ہے کہ ٹیلی کام شعبےمیں مالی سال2022-21 میں 694 ارب ریونیو حاصل ہوا ، 2،073 ملین امریکی ڈالر کی سرمایہ کاری ہوئی اور قومی خزانے میں 325.2 ارب کا حصہ ڈالا۔
سالانہ رپورٹ میں کہا ہے کہ 222 ارب 70 کروڑ، 102 ارب 50 کروڑ آمدنی نیکسٹ جنریشن موبائل سروسز نیلامی اور لائسنس تجدید سے ہوئی۔
پی ٹی اے کا کہنا تھا کہ پاکستان میں ٹیلی کام صارفین فکسڈ اورموبائل کی تعداد19کروڑ 70لاکھ سےزائد ہے جبکہ بائیو میٹرک طور پر تصدیق شدہ سمز اور سبسکرائبرز کی تعداد 19 کروڑ 40 لاکھ سے زائد ہوگئی ہے۔
رپورٹ کے مطابق براڈبینڈسبسکرپشن 56 فیصد کے ساتھ بڑھ کر12 کروڑ 40لاکھ ہو گئی جبکہ موبائل ڈیٹا کا سالانہ استعمال تقریباً 31 فیصد بڑھا جو اب 8،970 پیٹابائٹس ہے۔
پاکستان عالمی ٹیلی کمیونیکیشن یونین ریگولیٹرزکی درجہ بندی میں جی5ریگولیٹرکی ایڈوانسڈ سطح پرپہنچ گیا۔
پی ٹی اے نے شارٹ رینج ڈیوائسزاور آئی اوٹی فریم ورک بھی متعارف کرایا، ملکی تاریخ میں پہلی بار موبائل فون سیٹوں کے درآمد ی حجم میں کمی ہوئی ۔ مقامی طلب کا زیادہ ترحصہ مقامی سطح پر تیار کردہ مصنوعات کے ذریعے پورا ہوتا ہے۔
